Ortalyq Aziia elderi basshylarynyń bailanysy jandana tústi. Bul týraly Aqordada ótip jatqan Ortalyq Aziia elderi basshylarynyń jumys (konsýltativtik) kezdesýinde Qazaqstan Prezidenti Nursultan Nazarbaev aitty, dep habarlaidy Ult.kz tilshisi QazAqparat agenttigine silteme jasap.
«Tolyqtai alǵanda álemdik tájiribe óńirlik kooperatsiianyń halyqqa qyzmet etetindigin kórsetedi. Buǵan qosa, sońǵy ýaqytta elderimizdiń arasyndaǵy saiasi yntymaqtastyqta aitarlyqtai progreske qol jetkizilgendigi qýantady. Biz syrtqy saiasat vedomstvolary basshylarynyń arasynda besjaqty dialogty qolǵa qoia aldyq. Bul konsýltatsiialar dialogqa, kúsh biriktirýge ortaq umtylystyń bar ekendigin kórsetti», - dedi Nursultan Nazarbaev.
Memleket basshysy BUU Qaýipsizdik keńesine tóraǵalyq etken kezde Niý-Iorkte Ortalyq Aziia elderi Syrtqy ister ministrleriniń jiynǵa qatysqanyn joǵary baǵalady.
«Bul óte jaqsy qoldaý boldy jáne biz ár ýaqytta da bir-birimizdi qoldap, osylai jasaýymyz qajet», - dedi QR Prezidenti.
Elbasy Ortalyq Aziia elderiniń basshylary arasyndaǵy bailanystar da jandana túskendigin basa aitty.
«Ótken jyldyń naýryzynan bir jyldyń ishinde óńirdiń barlyq prezidentteri bir-birimen kezdesti. Ózbekstan kórshilerine qatysty aýqymdy jumystardy atqarǵanyn basa atap ótkim keledi. Shavkat Mirziioev qysqa ǵana ýaqyttyń ishinde sońǵy 20 jylda jinaqtalǵan problemalardyń tońyn jibitti. Qyrǵyzstannyń jańa prezidenti Sooronbai Jeenbekovtiń te úlesin atap ótpesem bolmas. Ol kelisimen kúrmeýli máseleler men problemalardy sheshý úshin kórshilerimen bailanystardy jandandyrdy», - dedi Elbasy.
Sonymen qatar Memleket basshysy Tájikstan Prezidenti Emomali Rahmonnyń aǵymdaǵy jyldyń maýsymynda Dýshanbede «Sý turaqty damytý úshin» atty halyqaralyq deńgeide konferentsiia ótkizý nietin joǵary baǵalady.
«Aǵymdaǵy jyly Araldy qutqarý halyqaralyq qorynyń qurylǵanyna 20 jyl tolady. Bul turǵyda Túrkimenstan Prezidenti Ǵurbanǵuly Berdimuhamedovtiń osy jyldyń tamyz aiynda Aral qorynyń quryltaishy memleketter basshylarynyń mereitoilyq sammitin ótkizý josparyn qoldaimyz», - dedi Nursultan Nazarbaev.
Aita keteiik, keńeske Qyrǵyz Respýblikasynyń Prezidenti Sooronbai Jeenbekov, Tájikstan Respýblikasynyń Prezidenti Emomali Rahmon, Ózbekstan Respýblikasynyń Prezidenti Shavkat Mirziioev jáne Túrikmenstan Medjlis tóraiymy A.T.Nýrberdyeva hanym qatysýda.
