Memleket basshysy Ońtústik Qazaqstan oblysynyń jurtshylyq ókilderimen kezdesti, - dep habarlaidy "Ult aqparat" Aqordaǵa silteme jasap.
Elbasy kezdesýde óńirdiń biregei tarihyna jáne mádeni ereksheligine toqtaldy.
– Ońtústik Qazaqstan – qazaqylyqtyń qaimaǵy buzylmaǵan ólke. Bul – abyzdar men áýlielerdiń qasieti daryǵan, Qoja Ahmet Iassaýi men Ál-Farabidiń izi qalǵan, kóne mádeni muraǵa bai kieli jer. Qazir bul óńirde búkil el halqynyń 16%-y turady, – dedi Nursultan Nazarbaev.
Qazaqstan Prezidenti ońtústik óńirdiń tarihyn tutas Qazaqstannyń tarihy deýge bolatynyn atap ótti.
– Ońtústik Qazaqstan oblysynyń ózinde 800-den astam tarihi-mádeni eskertkish bar. Álemge áigili jádigerlerimizdiń kópshiligi osynda. Túrkistan, Otyrar, Sairam, Saýran qalalary, Qoja Ahmet Iassaýi, Arystan bab keseneleri – bizdiń maqtanyshymyz. Osyndaǵy árbir tóbe men qyrqanyń, ózen men kóldiń attary – tunyp turǵan tarih. Mártóbe, Kúltóbe jáne Ordabasy – halqymyzdyń saqtalýyna áser etken qazaqtyń birligi men tutastyǵynyń qasietti simvoly. Biz osynyń bárin urpaqtyń sanasyna sińirýimiz kerek. Jastardy patriotizmge, otanshyldyqqa, týǵan jerdi súiýge baýlý qajet, – dedi Memleket basshysy.
Nursultan Nazarbaev elde úshtildilikti tolyqqandy engizýdiń ózektiligine taǵy da toqtalyp, álipbidi aýystyrýǵa qatysty kúmándi seiiltti.
– Aǵylshyn tilin oqytýdy jandandyrý qajet, ol iskerlik ortanyń barlyq salasynda qoldanylatyn bolady. Bul – zaman talaby, tek bizge bailanysty emes, – dedi Elbasy.
Kezdesý barysynda Qazaqstan Prezidenti oblystyń damýyndaǵy birqatar problemalyq máselelerge toqtaldy.
– Bul óńir áli de dotatsiialy aýmaq bolyp otyr. Oblys biýdjetinde ótken jyly menshik tabystary nebári besten bir bólikti qurady. Respýblikalyq biýdjetten kelip túsetin túsimder 80 paiyzdan asty. Biýdjetke túsetin salmaqty azaitý, menshik tabystarynyń úlesin ulǵaitý jóninde shara qabyldanbai otyr, – dedi Memleket basshysy.
Elbasy bizneske árdaiym qoldaý kórsetý qajet ekenine nazar aýdardy.
– Biylǵy joldaýda biznes ortasynyń jaǵdaiyn jaqsartý jóninde sharalar ázirleýdi tapsyrdym. Qosymsha jer ýchaskesin bólý, jalǵa berý merzimin uzartý, ony paidalaný maqsatyn ózgertý týraly ruqsat alý qujattaryn qarastyrý merziminiń uzaqtyǵyna bailanysty máselelerdi sheshý kerek. Bul rásimderdi jariia túrde júzege asyryp, qaǵazbastylyqqa salynýǵa jol bermegen jón. Kásipkerlikti damytý qarjylyq turaqtylyqty saqtap, óńirdiń óz-ózin qamtamasyz etý qabiletin arttyratyn mańyzdy tetikke ainalýǵa tiis, – dedi Nursultan Nazarbaev.
Sonymen birge Qazaqstan Prezidenti investitsiia tartý baǵytynda júieli sharalar qabyldaý qajettigin atap ótti.
– 2016 jyldyń qorytyndysy boiynsha jalpy investitsiia kólemi tómendegen. Óńirde aýyl sharýashylyǵyn, óńdeý ónerkásibin, týrizmdi damytýǵa barlyq múmkindik bar, – dedi Memleket basshysy.
Qazaqstan Prezidenti óńirdiń týristik áleýetin damytýdyń mańyzdylyǵyna arnaiy toqtaldy.
– Men «Bolashaqqa baǵdar: rýhani jańǵyrý» atty maqalamda «Qazaqstannyń qasietti rýhani qundylyqtary» jobasyn ázirleýdi tapsyrdym. Bul oraida biz Qazaqstannyń mádeni jáne tarihi murasyn negizge alýymyz kerek. Ońtústik Qazaqstan oblysy qaitalanbas ári búlinbegen tabiǵi jáne iri mádeni-tarihi qundylyqtary bar orasan zor týristik áleýetke ie. Sondyqtan tiimdiligi joǵary jáne básekege qabiletti týristik infraqurylym túzý kerek, – dedi Memleket basshysy.
Qazaqstan Prezidenti halyqty, sonyń ishinde jastardy jumyspen qamtýdy jaqsartý úshin túbegeili sharalar qabyldaý qajettigin atap ótti.
– Bedeldi joǵary oqý ornyn bitirý árdaiym mańyzdy bola bermeidi. Eń bastysy – eńbek naryǵynda suranys bar mamandyqqa ie bolý. Bul, ásirese, aqparattyq tehnologiialar, óndiristi tsifrlandyrý jáne kompiýterlendirý dáýirinde ózekti bolmaq. Taiaý bolashaqta qazirgi mamandyqtardyń 50%-na suranys bolmaidy. Sondyqtan ýaqyt talabyna sai bolý kerek, – dedi Nursultan Nazarbaev.
Osy oraida, Qazaqstan Prezidenti turǵyndardy eńbek resýrsy kóp óńirden jumys kúshi jetispeitin óńirge kóshirý jónindegi baǵdarlama bar ekenin eske saldy.
– Baǵdarlama sizderdiń de oblystaryńyzda qoldanylady. Men sizderdiń eńbekqor halyq ekenderińizdi jaqsy bilemin. Soltústik, shyǵys óńirlerge qonys aýdaryp, elimizdiń damýy men bolashaǵyna zor úles qosyp kelesizder. Osy baǵyttaǵy jumysty jalǵastyrý kerek. Oblys ákimine Úkimetpen birlesip, halyqty jumyspen qamtý jáne ony qonystandyrý deńgeiin arttyrý jóninde sharalar qabyldaýdy tapsyramyn, – dedi Memleket basshysy.
Qazaqstan Prezidenti oblysta qurylys, farmatsevtika jáne kólik-logistika klasterleri qalyptasyp, jeńil ónerkásip salasyndaǵy kásiporyndar damyp kele jatqanyn atap ótti.
– Óńirdiń ereksheligin eskerip, Úshinshi jańǵyrý jaǵdaiynda aýyl sharýashylyǵy ónimin qaita óńdeý isin, óńdeý ónerkásibiniń eksporttyq óndiristerin damytý qajet. Jańa ósim núktelerin – tirek jobalardy aldymen oblys ortalyǵynda damytý kerek, – dedi Nursultan Nazarbaev.
Budan bólek, Memleket basshysy óńirdiń aýyl sharýashylyǵy salasyndaǵy áleýetin iske asyrýdyń mańyzdylyǵyn atap ótti.
– Agroónerkásip keshenin damytý baǵdarlamasynyń múmkindikterin tolyq paidalana bilý kerek. Eń basty baǵyttar – aýyl sharýashylyǵy óniminiń shyǵymdylyǵyn arttyrý, otandyq taýar óndirýshilerdi qoldaý, zamanaýi agrotehnikany qoldaný, – dedi Qazaqstan Prezidenti.
Ońtústikqazaqstandyqtar Memleket basshysynyń «Bolashaqqa baǵdar: rýhani jańǵyrý» atty maqalasyndaǵy oi-pikirlerin tolyq qoldaityndyqtaryn aityp, Nursultan Nazarbaevqa óńirge degen qamqorlyǵy úshin rizashylyqtaryn bildirdi.
Sondai-aq, kezdesý aiasynda Ońtústik Qazaqstan oblysynyń ákimi J.Túimebaev oblystyń áleýmettik-ekonomikalyq ahýaly jáne ony damytý perspektivalary týraly baiandady.
Kezdesý sońynda Memleket basshysy qatysýshylarǵa zor tabys jáne bereke-birlik tiledi.
.jpeg)