Memleket basshysy Koreia Respýblikasynyń Syrtqy ister ministri Kan Gion Hvamen kezdesti, dep habarlaidy "Ult aqparat".
Kezdesý barysynda taraptar yntymaqtastyqtyń ózekti máselelerin jáne eki el arasyndaǵy saýda-ekonomikalyq qarym-qatynastardyń damý perspektivalaryn talqylady.
Nursultan Nazarbaev Koreia Respýblikasynyń Syrtqy ister ministrine iltipat bildirip, ekijaqty bailanystardyń senimdi sipatqa ie bolyp otyrǵanyn atap ótti.
– Astana men Seýl arasynda senimge negizdelgen dostyq qatynas ornap, ekonomikalyq yntymaqtastyq qarqyndy damyp keledi. Ekonomikalyq jáne gýmanitarlyq ózara yqpaldastyqtyń kóptegen máseleleri sheshimin tabýda. Sizderdiń Ortalyq Aziiada júrgizip jatqan belsendi jumystaryńyzdy qoldaimyz, – dedi Qazaqstan Prezidenti.
Koreia Respýblikasynyń Syrtqy ister ministri kezdesýge múmkindik bergeni úshin rizashylyq bildirip, Qazaqstan astanasynan alǵan áseri jóninde aitty.
– Bul – Qazaqstanǵa jáne Astanaǵa jasaǵan alǵashqy saparym. Men úshin saparymnyń elordalaryńyzdyń 20 jyldyǵyn merekeleý qarsańynda ótýiniń máni zor. Osy kezeń ishinde Astana damýdyń úlken jolynan ótkenine tánti boldym, – dedi Kan Gion Hva.
Kezdesýde syrtqy ister vedomstvosynyń basshysy Qazaqstan Prezidenti Nursultan Nazarbaevqa Koreia Respýblikasynyń Prezidenti Mýn Chje Inniń ystyq yqylasyn jetkizdi.
– Prezident Mýn Chje In 25 jyl ishinde elderimiz arasynda qalyptasqan berik negizge súiene otyryp, yqtymaqtastyǵymyzdy odan ári damytýǵa jáne nyǵaita túsýge nietti, – dedi Kan Gion Hva.
