«Nur Otan» partiiasynyń Tóraǵasy Nursultan Nazarbaev Parlament Májilisindegi partiia fraktsiiasynyń otyrysyna qatysty, dep habarlaidy "Ult aqparat" Elbasynyń resmi saityna silteme jasap.
Jiyndy ashqan Elbasy fraktsiia depýtattaryn kezekti Parlament sailaýynda «Nur Otan» partiiasynyń jeńiske jetýimen taǵy da quttyqtady.
– Biz jurtshylyqtyń senimin aqtaýymyz kerek. Bul – óte mańyzdy mindet ári úlken jaýapkershilik. Sondyqtan bizdiń partiiamyzdyń sailaýaldy baǵdarlamasynda aiqyndalǵan mindetterge qol jetkizý úshin fraktsiia depýtattary baryn salýǵa tiis, – dedi Nursultan Nazarbaev.
Qazaqstannyń Tuńǵysh Prezidenti elimizdiń ornyqty damýy men halyqtyń ál-aýqatyn arttyrýdy qamtamasyz etý boiynsha partiia jumysynyń nátijelerine toqtaldy.
– Damyǵan 30 eldiń qataryna qosylý úshin bizdiń naqty josparymyz bar, resýrs ta jetkilikti. Osy jolda Parlamenttegi eń úlken fraktsiia retinde basty jaýapkershilik sizderge júkteletin bolady. Alǵa qoiǵan maqsattarǵa qol jetkizý úshin aianbai eńbek etesizder degen senimdemin. Barshańyzǵa belgili, depýtattar quramy birshama ózgerdi. Jańa adamdar jańa ideia ákeledi jáne Parlamenttiń qyzmetine tyń serpin beredi dep sanaimyn, – dedi Partiia Tóraǵasy.
Nursultan Nazarbaev Májilistiń jetinshi shaqyrylymynyń jumysy Táýelsizdiktiń 30 jyldyǵymen tuspa-tus kelýiniń simvoldyq máni zor ekenin atap ótti.
– Ótken sailaýda jurtshylyq bizdiń partiiamyzǵa úlken senim bildirdi. Halyqaralyq baiqaýshylar qazaqstandyqtardyń joǵary belsendiligi men uiymshyldyǵyn atap ótti. Sailaý ashyq ári demokratiialyq talaptarǵa sai ótti. Osy joly da «Nur Otan»-nyń naqty ister partiiasy ekenin dáleldei alasyzdar dep kámil senemin, – dedi Elbasy.
Qazaqstannyń Tuńǵysh Prezidenti Májilistiń ótken shaqyrylymynyń jumys nátijelerine toqtalyp, Parlament depýtattary men Úkimet músheleri qoian-qoltyq jumys istegenin aitty.
– Fraktsiianyń tiimdi jumysyn qamtamasyz etý úshin birneshe mindetti sheshken jón. Birinshiden, depýtattar Úkimetpen birlese otyryp, jurtshylyq tarapynan qoldaý tapqan partiianyń sailaýaldy baǵdarlamasynyń nátijeli júzege asyrylýyn qamtamasyz etýi kerek. Ekinshiden, depýtattar biýdjet qarajatynyń tiimdi jumsalýyna baqylaýdy kúsheitýge tiis. Úshinshiden, barlyq áleýmettik toptarmen keri bailanysty nyǵaitqan abzal. Depýtattar turaqty túrde turǵyndarmen kezdesip, azamattardy qoǵamdyq qabyldaýlarda qabyldap otyrýy qajet, – dedi Nursultan Nazarbaev.
Otyrys barysynda «Nur Otan» partiiasynyń Tóraǵasy jetinshi shaqyrylymdaǵy Parlament Májilisindegi partiia fraktsiiasynyń jetekshisi qyzmetine Nurlan Nyǵmatýlindi usyndy. Depýtattar Elbasy usynysyn bir aýyzdan qoldady.
Sondai-aq Qazaqstannyń Tuńǵysh Prezidenti Konstitýtsiiaǵa jáne «Parlament jáne onyń depýtattarynyń mártebesi týraly» konstitýtsiialyq zańǵa sáikes fraktsiia depýtattary Májilis Tóraǵasy, onyń orynbasarlary men Parlamenttiń tómengi palatasynyń turaqty komitetteriniń tóraǵalary laýazymyna kandidattardy usyný jáne bekitý protsedýrasyna qatysýy kerek ekenin atap ótti. Osyǵan bailanysty Nursultan Nazarbaev Parlament Májilisiniń basshylyq laýazymdaryna kandidatýralardy talqylaýdy usyndy.
Otyrys barysynda Májilistegi basshylyq laýazymdarǵa kandidattardy usyný boiynsha fraktsiianyń ortaq ustanymy ázirlendi. Oǵan sáikes Májilis Tóraǵasy qyzmetine N.Nyǵmatýlin, Májilis Tóraǵasynyń orynbasarlary qyzmetine P.Kazantsev pen B.Kesebaeva, Áleýmettik-mádeni damý komitetiniń tóraǵasy qyzmetine J.Nurmanbetova, Zańnama jáne sot-quqyqtyq reforma komitetiniń tóraǵasy qyzmetine Q.Mýsin, Qarjy jáne biýdjet komitetiniń tóraǵasy qyzmetine M.Qusaiynov, Halyqaralyq ister, qorǵanys jáne qaýipsizdik komitetiniń tóraǵasy qyzmetine A.Quspan, Ekonomikalyq reformalar jáne óńirlik damý komitetiniń tóraǵasy qyzmetine A.Raý usynyldy.
Sonymen qatar Elbasy bolashaq Premer-Ministrdiń kandidatýrasy týraly aitty.
– Meniń oiymsha, sabaqtastyqty saqtaǵan jón. Qiyndyqtarǵa qaramastan, Úkimet óz jumysyn jaqsy atqardy. Ózge eldermen salystyrǵanda biz jaqsy nátije kórsettik. Eger Prezident Mamin Asqar Uzaqbaiulyn usynsa, onda men sizderden onyń kandidatýrasyn qoldaýlaryńyzdy suraimyn, – dedi Nursultan Nazarbaev.
Sońynda Qazaqstannyń Tuńǵysh Prezidenti jiynǵa qatysýshylardy taǵy da ótken sailaýdaǵy aiqyn jeńispen quttyqtap, fraktsiia depýtattaryna tabysty jumys tiledi.
– «Nur Otan» partiiasynyń depýtattyq fraktsiiasy árdaiym Parlamenttegi jetekshi saiasi kúsh bolyp keledi. Aldaǵy ýaqytta da solai bolaryna senimim mol, – dedi Nursultan Nazarbaev.
