Meditsinalyq-sanitarlyq alǵashqy kómek boiynsha jańa Astana deklaratsiiasyn qabyldaý - búkil álemdegi densaýlyq saqtaý salasy úshin mańyzdy kezeń bolary anyq. Elordada ótip jatqan meditsinalyq-sanitarlyq alǵashqy kómek jónindegi jahandyq konferentsiiaǵa joldaǵan videojoldaýynda Qazaqstan Prezidenti Nursultan Nazarbaev osylai málimdedi, dep habarlaidy QazAqparat tilshisi.
«Osydan 40 jyl buryn álem jurtshylyǵy Almaty qalasyna jinalyp, onda Dúniejúzilik densaýlyq saqtaý uiymyna múshe memleketter alǵashqy meditsinalyq-sanitarlyq kómek jónindegi Almaty deklaratsiiasyn qabyldady. Atalǵan tarihi qujat kóptegen memleketterdiń JOO-larynyń oqýlyqtaryna engizildi. 1978 jyly DDU deklaratsiiasyna qol qoiylýy - halyqaralyq kúsh-jigerdi jumyldyrýda tiimdiliktiń jarqyn úlgisin kórsetip berdi. Onda alǵashqy meditsinalyq-sanitarlyq kómektiń bazalyq qaǵidattary aiqyndaldy. Olar - halyqtyń sanitarlyq baǵytta aqparattandyrý, ana men balanyń densaýlyǵyn qorǵaý, aýrýlardyń aldyn alý, onyń ishinde vaktsinatsiia men dári-dármektermen qamtamasyz etý sekildi mańyzdy qaǵidattar. Odan beri álemniń densaýlyq saqtaý baǵyty osy negizgi baǵyttar boiynsha damyp kele jatyr», - dedi Nursultan Nazarbaev jahandyq konferentsiiaǵa joldaǵan óziniń videjoldaýynda.
Qazaqstan Prezidenttiniń aitýynsha qazirgi tańda adamzat jańa syn-tegeýrinderdiń aldynda tur.
«Qorshaǵan ortanyń buzylýy, ómirlik qozǵalystyń azaiýy, durys tamaqtanbaý - sozylmaly aýrýlardyń artýyna alyp keldi. Óz kezeginde halyqtyń aýrý-syrqattarǵa shaldyǵýy áleýmettik qamtamasyz etý salasyna túsetin júktemeden asyp ketti. Qazirgi kezeńde densaýlyq saqtaý salasyn qarjylandyrý men meditsinalyq jaǵdaidy qamtamasyz etý basa mańyzǵa ie bolyp keledi. Bul taqyryptar BUU Bas Assableiasynyń otyrysynda 2019 jyly talqylanatyn bolady», - dedi Elbasy.
Nursultan Nazarbaev óz sózinde tehnologiialyq revaliýtsiianyń qazirgi kezeńdegi damýy adamzattyń aldyna jańa múmkindikterdi ashyp otyrǵanyn atap ótti.
«Búgingi kúni búkil álemdegidei Qazaqstanda belsendi túrde tsifrlyq ózgerister júrgizilip jatyr. Odan densaýlyq saqtaý salasy da qalys qalmaidy. Halyqtyń densaýlyǵyn qamtamasyz etý - ulttyń ál-aýqatynyń ósiminiń negizi bolyp tabylady. Barlyq memlekettiń basshylaryn bul baǵytty memlekettik saiasattyń basty basymdyǵy retinde aiqyndap alýǵa shaqyramyn. Meditsinalyq-sanitarlyq alǵashqy kómek boiynsha jańa Astana deklaratsiiasyn qabyldaý - búkil álemdegi densaýlyq saqtaý salasy úshin mańyzdy kezeń bolary anyq. Bul baǵdarlamalyq qujat jahandyq deńgeide ómir sapasyn arttyrýǵa, adamdardyń densaýlyǵyn jaqsartýǵa úles qosaryna senimdimin», - dedi Qazaqstan Prezidenti.
Eske sala ketsek, elordada búgin meditsinalyq-sanitarlyq alǵashqy kómek jónindegi Jahandyq konferentsiia ótip jatyr. Jiynda Densaýlyq saqtaý ministri Eljan Birtanov jańa Astana deklaratsiiasy qabyldanatynyn jetkizgen edi.
