Nazarbaev Medina qalasyndaǵy Muhammed Paiǵambar meshitinde namaz oqydy

Qazaqstan Prezidenti Saýd Arabiiasy Koroldigine resmi saparmen keldi, - dep habarlaidy "Ult aqparat" Aqordaǵa silteme jasap.

Medina qalasyna kelisimen Nursultan Nazarbaev provintsiia gýbernatory Hanzada Feisal ben Salman Ál Saýdpen ekijaqty kezdesý ótkizdi.

Budan bólek, Memleket basshysy Medina qalasyndaǵy Muhammed Paiǵambar meshitine baryp, namaz oqydy, sondai-aq Masdjid an-Nabavi meshitiniń sáýletimen jáne intererimen tanysty.

Odan keiin Qazaqstan Prezidenti Saýd Arabiiasy Koroli Salman ben Ábdel Ál Saýdpen kelissózder nátijesi boiynsha birqatar ekijaqty qujattarǵa qol qoiý josparlanyp otyrǵan Er-Riiad qalasyna keldi.

Sapar barysynda Saýd Arabiiasy Koroldiginiń taǵy birqatar resmi tulǵalary men isker toptary ókilderimen kezdesýler ótkizý qarastyrylǵan.

Eske salaiyq, osyǵan deiin Nazarbaevtyń Saýd Arabiiasyna baratyny jaily habarlanǵan bolatyn. Qazaqstan Prezidentiniń Saýd Arabiiasynda 24 jáne 25 qazanda bolatyny aitylǵan edi. Keiin Aqorda Nazarbaevtyń qajylyqqa barǵan videosyn jariia etti. "Nursultan Nazarbaevtyń Saýd Arabiiasyna aldaǵy resmi saparyna bailanysty sizderdiń nazarlaryńyzǵa 2012 jyly túsirilgen "Galstýksyz úlken saiasat" derekti filmin usynamyz. Onda Memleket basshysy Nursultan Nazarbaevtyń 1994 jyly alǵash ret Er-Riiadqa barǵan saparyndaǵy mańyzdy sátter aitylady", - delingen jariialanǵan habarlamada.