Qazaqstan Prezidenti Máskeý memlekettik halyqaralyq qatynastar institýtynyń túlekterimen kezdesti, dep habarlaidy Aqordanyń baspasóz qyzmeti.
Kezdesýge Parlament Senatynyń tóraǵasy Q.Toqaev, Resei Federatsiiasynyń Syrtqy ister ministri S.Lavrov, Máskeý memlekettik halyqaralyq qatynastar institýtynyń rektory A.Torkýnov, ERG kompaniiasy direktorlar keńesiniń múshesi P.Shodiev, Qazaqstannyń Syrtqy ister ministri Q.Ábdirahmanov qatysty.
Áńgime barysynda Nursultan Nazarbaev Máskeý memlekettik halyqaralyq qatynastar institýtynyń mártebesi erekshe ekenin aityp, onyń diplomattar men syrtqy saiasat vedomstvolary qyzmetkerleriniń arasyndaǵy bedeli joǵary ekenin atap ótti.
- Máskeý memlekettik halyqaralyq qatynastar institýty únemi kópshilik bilim alýǵa umtylatyn airyqsha oqý orny boldy. Jastarymyz qazir de sonda oqyǵandy qalaidy. Biz Máskeý memlekettik halyqaralyq qatynastar institýtymen jáne Astanada filialy bar Máskeý memlekettik ýniversitetimen tiimdi bailanystar ornattyq, - dedi Memleket basshysy.
Qazaqstan Prezidenti memleketaralyq dialogty nyǵaitý máselesine toqtalyp, diplomatiialyq kadrlardy Eýraziialyq ekonomikalyq odaqtyń jumysyna tartý qajettigin aitty.
Kezdesýge qatysýshylar Astanada ótip jatqan Máskeý memlekettik halyqaralyq qatynastar institýty túlekteriniń IV halyqaralyq forýmynyń aýqymdylyǵy men onyń elderimiz arasyndaǵy diplomatiialyq bailanystardy kúsheitýdegi rólin atap ótti.
