«Jas sarbaz» balalar men jasóspirimder áskeri-patriottyq qozǵalysy» respýblikalyq qoǵamdyq birlestigi elimizdiń barlyq óńirine taralýy tiis. Bul týraly búgin Astanada atalǵan birlestik tárbielenýshilerimen kezdesý barysynda Elbasy - QR Qarýly Kúshteriniń Joǵarǵy Bas Qolbasshysy Nursultan Nazarbaev aitty, dep habarlaidy "Ult aqparat".
Kezdesý barysynda QR Prezidenti rýhy myqty halyqtyń bolashaǵy da zor bolatyndyǵyn atap ótip, oǵan naqty mysal da keltirdi.
«Másele halyqtyń kóptiginde, memlekettiń úlkendiginde emes. Másele - ulttyq rýhta. Oilap qarańdar, bar bolǵany 16 mln halqy bar vetnam eli AQSh-qa qarsy turyp, jeńip shyqty. AQSh alyp el edi, qarý-jaraǵy da kóp edi. Ǵylymi tehnikasy da kóp edi. Qansha aýyldaryn órtedi, qansha adamdaryn qyrdy. Adamdaryn zyndanǵa otyrǵyzdy. Biraq, jeńe almady. Sebebi, rýhy joǵar el edi. Munyń barlyǵy belgili», - dedi Elbasy.
Memleket basshysy kóp memlekette jigitteri de, qyzdar da birge áskeri shepte turyp, elin, jerin qorǵaityndyǵyn aitty.
«Mysaly Izrail memleketin alatyn bolsaq, barlyq qyzdar áskeri mindetin ótep shyǵady. El qorǵaý - barlyq jurttyń, halyqtyń moiynda turǵan mindet. Ata-babamyz amanat etken osy keń baitaq jerdi qalai saqtap qaldyq? Janqiiarlyq batyrlyqtyń arqasynda, qan tógip, ter tógýdiń arqasynda aman alyp qaldyq. Sol babalarymyzdyń rýhy bizde bolýy kerek», - dedi Nursultan Nazarbaev.
Sonymen qatar Elbasy «Jas sarbaz» balalar men jasóspirimder áskeri-patriottyq qozǵalysy» respýblikalyq qoǵamdyq birlestigi elimizdiń barlyq óńirine taralýy tiistigin atap ótti.
«Jastarymyzdyń barlyǵy osy uiymǵa kirýleri kerek. Denelerin shynyqtyryp, áskeri mamandyqty igerip, Qorǵanys ministrligimen birge jumys istep, bolashaq otan qorǵaýshylardy, eldiń bolashaq azamattaryn tárbieleýge at salysýy qajet. Sonda sizder Prezidenttiń de, eldiń de tiregi bola alasyzdar. Sol úshin biz jinalyp otyrmyz. Sol úshin men senderdiń aralaryńa kelip otyrmyn. Barshalaryńyzǵa shyn júregimmen zor densaýlyq, úlken baqyt, elimizdiń aman, jurtymyzdyń tynysh bolýyn tileimin», - dedi QR Prezidenti.
.jpeg)