Mańǵystaý oblysyna jumys sapary aiasynda Memleket basshysy óńir jurtshylyǵymen kezdesti. Oǵan eńbegi sińgen ardagerler, ónerkásip kásiporyndarynyń jumysshylary, jastar kóshbasshylary, sportshylar, qoǵamdyq uiymdar men etnomádeni birlestikterdiń jetekshileri qatysty, - dep habarlaidy "Ult aqparat" Aqordaǵa silteme jasap.
Elbasy Qazaqstannyń jahandyq básekege qabilettiligin damytýdy kózdeitin mindetterdiń aýqymdy ekendigin aitty.
Qazaqstan Prezidenti táýelsizdik jyldarynda Mańǵystaýdyń el ónerkásibindegi úlesiniń artqanyna toqtaldy.
– Ótken jyldarda Mańǵystaý oblysynyń ekonomikasy aitarlyqtai ósti. Táýelsizdik alǵan kezden bastap óńirlik jalpy ónim 32 ese kóbeiip, 2 trillion teńgeden asty. 7 million sharshy metr turǵyn úi salyndy. 2016 jyly óńirge tartylǵan investitsiia 400 milliard teńge boldy. Bul – 2000 jylmen salystyrǵanda 12 ese artyq, – dedi Nursultan Nazarbaev.
Memleket basshysy Mańǵystaý oblysynyń eleýli energetikalyq, ónerkásiptik jáne kólik-logistikalyq áleýeti bar ekenin aitty.
– Eýraziianyń dál ortasynda ornalasqan Qazaqstan árdaiym qurlyqtaǵy el bolyp sanalyp keldi. Búgingi tańda biz qurlyq aýqymymen shektelip qalmai, tomaǵa-tuiyqtyq sheńberin buzdyq. Aqtaýda zamanaýi teńiz portyn saldyq, beinelep aitqanda, «jolsyz jerden jol ashtyq», – dedi Elbasy.
Sondai-aq, Qazaqstan Prezidenti júieli damýdyń jarqyn mysaly retinde «Aqtaý teńiz porty» arnaiy ekonomikalyq aimaǵyn atap ótti.
Nursultan Nazarbaev shekara mańyndaǵy yntymaqtastyqtyń mańyzy áleýetin paidalaný qajettigine toqtaldy.
– Qazaqstan árdaiym kórshiles eldermen dostyq qarym-qatynas ornatyp keledi. Keshe ǵana men Ázerbaijanda boldym. Bul elmen yntymaqtastyqty keńeitý úshin múmkindikterimiz mol. Sońǵy eki jyldyń ózinde Mańǵystaý oblysy men Ázerbaijan arasyndaǵy ózara taýar ainalymy bes ese ósken. Aimaqtaryńyz Qazaqstandy jahandyq jáne óńirlik naryqtarmen bailanystyratyn asa mańyzdy tranzit toraby bolyp sanalady. Bul orasan zor áleýetti tolyq paidalana bilgen jón, – dedi Memleket basshysy.
Sonymen birge, Qazaqstan Prezidenti óńirdiń áleýmettik saladaǵy jetistikterin atap ótti.
– Táýelsizdik jyldary oblys turǵyndarynyń sany eki ese ósip, 640 myń adam boldy. Halyqtyń ómir jasy da uzaryp keledi. Osy jyldar ishinde 271 myń bala dúniege keldi. Bul respýblika boiynsha eń joǵary kórsetkish bolyp tabylady. Tarihi Otanyna 125 myńnan astam adam oraldy. Bul – tutas bir qala. Shirek ǵasyrda meditsina mekemeleriniń sany eki jarym ese, al mektepter eki ese artqan. 229 balabaqsha paidalanýǵa berildi, – dedi Nursultan Nazarbaev.
Mańǵystaý oblysynyń ákimi E.Toǵjanov oblystaǵy áleýmettik-ekonomikalyq jaǵdai men ony damytý perspektivalary týraly baiandady.
Jurtshylyq ókilderi sóilegen sózderinde óńirdi damytý máselelerine udaiy kóńil aýdaryp, tiimdi memlekettik saiasaty júrgizip otyrǵany úshin Memleket basshysyna rizashylyq bildirdi.
Sońynda Memleket basshysy jiynǵa qatysýshylardyń nazaryn elimizdiń tabysty damýynyń kepili bolyp sanalatyn birlikti, tatýlyq pen dostyqty saqtaý qajettigine aýdaryp, mańǵystaýlyqtarǵa zor densaýlyq jáne baq-bereke tiledi.
.jpeg)