Qazaqstannyń Tuńǵysh Prezidenti Nursultan Nazarbaev Premer-Ministr Asqar Mamindi qabyldady, dep habarlaidy "Ult aqparat" Elbasynyń baspasóz qyzmetine silteme jasap.
Kezdesý barysynda Elbasyǵa Qazaqstandaǵy qazirgi áleýmettik-ekonomikalyq ahýal jáne halyqtyń ál-aýqatyn arttyrý boiynsha qabyldanǵan sharalar týraly aqparat usynyldy.
Qazaqstannyń Tuńǵysh Prezidenti Bes institýtsionaldyq reformany iske asyrýǵa baǵyttalǵan «100 naqty qadam» Ult jospary tarmaqtaryn sapaly oryndaýdyń mańyzdylyǵyna nazar aýdardy.
– Ekonomikadaǵy ahýal jaman emes. Qazir «100 naqty qadam» Ult josparyn muqiiat júzege asyrý mańyzdy. Oryndalǵan mindetter bar, biraq erekshe mán berýdi qajet etetin oryndalmaǵan tarmaqtar da qalyp otyr, – dedi Nursultan Nazarbaev.
Óz kezeginde Asqar Mamin 2019 jyldyń qorytyndysy boiynsha qol jetkizgen ekonomikalyq damýdyń negizgi kórsetkishteri jáne ulttyq ekonomikany odan ári nyǵaitý jónindegi josparlary týraly málimet berdi.
– El ekonomikasy turaqty damyp keledi. Biz joǵary ekonomikalyq kórsetkishterge qol jetkizdik. 2019 jyldyń nátijesi boiynsha JIÓ ósimi 4,5 paiyzdy qurady. Negizgi draiverler – qurylys, kólik, saýda, bailanys salalary, – dedi Premer-Ministr.
A.Maminnyń baiandamasyna sáikes qurylys salasynyń damý qarqyny 12,9%, saýda – 7,6%, bailanys – 5,2%, kólik – 5,1%, óńdeý salasy – 4,4%, taý-ken ónerkásibi – 3,7% qurady. Al halyqtyń tabysy 5,5%, negizgi kapitalǵa investitsiialar 8,5% ósip, saýda ainalymy 97 mlrd dollardy qurady.
