Elbasy Nursultan Nazarbaev Qytai Halyq Respýblikasynyń Qazaqstandaǵy Tótenshe jáne ókiletti elshisi Chjan Siaomen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstannyń Tuńǵysh Prezidenti eki memleket arasynda ornyqqan qarym-qatynastyń joǵary deńgeide ekenin atap ótip, ony ári qarai damytýdyń perspektivalaryna toqtaldy.
– Sizben júzdeskenime qýanyshtymyn. Tóraǵa Si Tszinpinniń birlesken jumystarymyzdyń nátijeleri men perspektivalary talqylanatyn «Bir beldeý, bir jol» atty forýmǵa qatysýǵa shaqyrýyn rizashylyqpen qabyl aldym. Sonymen qatar, biz jeti jyl boiy ózara túsinistik rýhynda birlese jumys istegen Qytai Halyq Respýblikasynyń Tóraǵasymen kelissóz ótkizý josparlanyp otyr, – dedi Nursultan Nazarbaev.
Qazaqstannyń Tuńǵysh Prezidenti kólik-logistika salasyndaǵy birlesken jobalardy iske asyrýdyń tiimdiligin aitty.
– Biz infraqurylymdy damytý jóninde aýqymdy jumys atqardyq. Biz Qytai Halyq Respýblikasymen jemisti yntymaqtastyqty óte joǵary baǵalaimyz jáne bul ózara tiimdi qatynastardy jalǵastyra beremiz, – dedi Elbasy.
Sonymen qatar, Nursultan Nazarbaev barsha Qytai halqyn Qytai Halyq Respýblikasynyń 70 jyldyǵymen quttyqtap, zor tabys jáne baq-bereke tiledi.
Elshi Chjan Siao Nursultan Nazarbaevqa Qytai Halyq Respýblikasynyń Tóraǵasy Si Tszinpinniń zor iltipatyn jetkizdi.
– «Bir beldeý, bir jol» atty ekinshi forým – 37 memleket pen úkimetterdiń basshylary qatysatyn aýqymdy halyqaralyq shara. Qatysýshylardyń ishinde Siz, Nursultan Ábishuly, bul is-sharanyń eń mańyzdy ári qurmetti qonaǵy bolasyz, – dedi QHR elshisi.
Chjan Siao «Bir beldeý, bir jol» bastamasy men «Nurly jol» jańa ekonomikalyq saiasattyń túiindesýiniń jemisti bolǵanyn atap ótti.
– Búginde birlesken 55 jobanyń 9-y júzege asyryldy. Osy jyldyń ishinde taǵy 8 jobany aiaqtaý josparlanýda. Yntymaqtastyǵymyzdyń jemisti bolýy, eń aldymen, Sizdiń sińirgen zor eńbegińizdiń arqasy, – dedi QHR elshisi.
