Qazaqstan Qytaidyń kómegimen Tynyq muhityna shyǵa alatyn tranzittik elge ainaldy. Búgin Aqordada elimizge resmi saparmen kelgen QHR Tóraǵasy Si Tszinpinmen shaǵyn jáne keńeitilgen quramdaǵy kelissózderden keiingi birlesken málimdeme barysynda Elbasy Nursultan Nazarbaev osylai málim etti, dep habarlaidy Ult.kz tilshisi QazAqparat agenttigine silteme jasap.
«Qytai bizdiń elimizdiń jetekshi syrtqy saiasi jáne syrtqy ekonomikalyq seriktesterimizdiń biri sanalady. Shirek ǵasyrdyń ishinde biz birqatar aýqymdy ekonomikalyq jobalardy júzege asyrdyq, saýda-ekonomikalyq bailanystardy kezeń-kezeńimen damytý qamtamasyz etildi», - dep atap ótti Elbasy.
QR Prezidenti búginde indýstrialdy-innovatsiialyq yntymaqtastyq baǵytyndaǵy qazaqstandyq-qytailyq baǵdarlamanyń júzege asyrylyp jatqandyǵyn aitty. Atalǵan baǵdarlama jalpy somasy 28 mlrd dollardy quraityn 51 jańa jobany Qazaqstanǵa kóshirýdi ári qurýdy qamtidy. Búginde onyń úsheýi iske qosylǵan, altaýy boiynsha jumystar júrgizilýde. 10 joba daiyndalyp jatsa, taǵy 16 joba júzege asyrý kezeńinde tur.
«Búgingi kelissózder barysynda biz energetika, kólik, aýyl sharýashyly salalaryndaǵy ózara is-qimyl máselelerin, sonymen birge transshekaralyq sý kózderin paidalaný jáne qorǵaý qaýipsizdik júiesin nyǵaitý, ásirese ǵylymi tehnikalyq jáne kiberqaýipsizdik salalaryndaǵy yntymaqtastyq jaiyn talqyladyq», - dedi Nursultan Nazarbaev.
Memleket basshysy Qytaidyń Jibek joly ekonomikalyq beldeý bastamasy aiasyndaǵy ózara is-qimyl máselelerine de jete nazar aýdarǵandyǵyn aitty.
«Biz bul ideiany belsendi qoldadyq jáne «Nurly jol» baǵdarlamamyz Qazaqstan arqyly batysqa qarai Jibek jolynyń tabiǵi jalǵasa sanalady. Muhitqa shyǵar múmkindigi joq elimiz QHR-diń kómegimen Qytaidyń shyǵys oblysyndaǵy Tynyq muhityna shyǵa alatyn tranzittik elge ainaldy. Búgin biz kórmege baryp, birlesken joldarymyzdy túiindestiretin bailanystar, ózara qarym-qatynastar jaiynda aitatyn telekópir ashatyn bolamyz», - dedi Elbasy.
.jpeg)