Nursultan Nazarbaev Qazaqstan musylmandary dini basqarmasynyń ókilderimen kezdesti, - dep habarlaidy "Ult aqparat" Aqordaǵa silteme jasap.
Kezdesýge Qazaqstan Respýblikasynyń Prezidenti Ákimshiligi basshysynyń orynbasary M.Tájin, Din isteri jáne azamattyq qoǵam ministri N.Ermekbaev, Qazaqstan musylmandary dini basqarmasynyń tóraǵasy, Bas múfti E.Maiamerov, imamdar – K.Dúisenbai, N.Esmaǵanbet, N.Aýyshanuly, A.Kerimbek, T.Ospan qatysty.
Elbasy qatysýshylarǵa arnaǵan sózinde Qazaqstan halqynyń ómirinde dinniń erekshe ról atqaratynyn atap ótip, memleket tarapynan dini qarym-qatynastardy retteý úshin qabyldanyp jatqan sharalarǵa toqtaldy.
– Memleket bul máselege erekshe kóńil bólip otyr. Problemalarǵa taldaý jasap, osy salaǵa qoldaý kórsetetin arnaýly ministrlik qurdyq.
Jaqynda men tarihi jáne rýhani bailyǵymyzdy saqtai otyryp, ony arttyrý, sanany jańǵyrtý qajettigi týraly maqala jariialadym. Patriotizm, otandy súiý, el ishindegi jáne óńirlerdegi turaqtylyq – bizdiń bolashaǵymyz. Sol úshin biz birlese jumys isteýge tiispiz, – dedi Memleket basshysy.
Nursultan Nazarbaev tsifrlyq tehnologiialar damyǵan dáýirde Qazaqstan óziniń ulttyq qundylyqtaryn, mádenieti men salt-dástúrin saqtaýǵa tiis ekenin aitty.
Sondai-aq, Qazaqstan Prezidenti destrýktivti dini aǵymdarǵa qarsy kúres júrgizý qajettigine nazar aýdardy.
– Qazaqstannyń aýmaǵy ulan-baitaq jáne tabiǵi qazba bailyq pen resýrstarǵa bai ekeni barshaǵa belgili. Osynyń bárine qyzǵanyshpen qaraityndar da bar. Olar – bizge qastyq oilap, qoǵamymyzdyń yntymaǵyn buzýǵa tyrysýshylar. Halqymyzdyń arasyna teris dini aǵymdardy engizý bizge syrttan yqpal etýdiń bir tásili bolyp sanalady. Sońǵy ýaqytta osyndai úrdis baiqalyp otyr. Biz memlekettigimizge qaýip tóndiretin kez kelgen qubylyspen kúresýge tiispiz. Sondyqtan sizderdiń aldaryńyzda zor mindetter tur, – dedi imamdarǵa arnaǵan sózinde Elbasy.
Memleket basshysy Qazaqstan musylmandary dástúrli túrde hanafi mazhabyn ustanatynyn, islamnyń osy baǵytynyń negizin túsindirýge mashyqtanǵan mamandar daiarlaý qajettigin atap ótti.
– Búginde Qazaqstan musylmandary dini basqarmasynda 3800 imam jumys isteidi. Olardyń jartysy dini saýattylyqty arttyrý kýrstarynan ótken. Alaida, munyń jetkiliksiz ekenin aita ketken jón. Bizge osy salada jumys isteitin imamdar men mamandardyń bilim deńgeiin arttyrý jaiyn oilastyrý qajet.
Oqyǵan imam ǵana durys bilim bere alady. Ol óz dinin tereń tanyp, ózge dinderdiń erekshelikterin zerttep, basqa da bilimderdi igergen adam bolýǵa tiis. Imamdar sheshendik ónerdi, adam psihologiiasyn meńgergen ideologtarǵa ainalýy kerek, – dedi Nursultan Nazarbaev.
Áńgime barysynda Qazaqstan Prezidenti «Nur Múbarak» ýniversitetiniń jumysymen jáne ony budan ári damytý josparymen tanysty.
Elbasy jas urpaqtyń dini saýatsyzdyǵyna airyqsha nazar aýdardy.
– Dini saýatsyzdyǵynyń nátijesinde jastarymyz saqal qoiyp, shalbarynyń balaqtaryn qysqartyp tastaidy. Qara kóilek kiip, beti-aýzyn tumshalaǵan qyzdarymyzdyń qatary kóbeidi. Bul bizdiń dástúrimizge de, halqymyzǵa da jat. Buǵan zańnamalyq deńgeide tyiym salý máselesin pysyqtaý kerek. Qazaq qara kiimdi qaraly kezde ǵana kiedi, – dedi Memleket basshysy.
Nursultan Nazarbaev qazaq mádenietiniń tarihyna, qazaq áielderiniń dástúrli kiimine toqtalyp, qara kiim men din arasynda eshqandai bailanys joq ekenin aitty.
– Eger jastarymyz halqymyzǵa jat ýaǵyzdarǵa erse, memleketimizdiń bolashaǵy ne bolmaq? Biz buǵan jol bermeimiz. Táýelsiz Qazaqstannyń bolashaǵy jarqyn, ultymyz tatý bolyp, elimiz zaiyrly memleket retinde odan ári damýǵa tiis. Biz ózimizdiń igi maqsatymyzǵa qarsy shyqqandarǵa kóne almaimyz. Bul – memlekettik apparattyń ǵana emes, barsha Qazaqstan halqynyń, onyń bolashaǵynyń múddesi, – dedi Qazaqstan Prezidenti.
Elbasy halyq arasyndaǵy dini saýattylyqtyń mańyzdylyǵyn atap ótip, imamdardyń óz qyzmeti barysynda patriottyq tárbiege den qoiýǵa tiis ekendigine nazar aýdardy.
– Naǵyz musylmandy kigen kiiminen emes, ishki imanynan tanidy. Kimniń júreginde súiispenshilik bolsa, sonyń imany bar. Biz órkenietti álemge qarai qadam basyp, ǵylym men bilim esigin ashýymyz qajet. XVIII-XIX ǵasyrlarǵa deiin musylman dúniesi búkil álemde kóshbasshy boldy. Ol ǵylymnyń qainar kózi, filosoftardyń, dárigerler men jazýshylardyń otany boldy. Qazir biz bul jaǵynan kóshbasshylyq ornymyzdan aiyrylyp qaldyq.
Búginde azamattarymyz internet arqyly túrli málimetter alady. Osylaisha, dástúrli emes aǵymdardyń da ýaǵyzyn tyńdap júr. Ol úshin túrli ádister men tehnologiialar qoldanylýda. Biz de olarmen kúres júrgizý úshin aqparattyq tehnologiialardy qoldanýymyz kerek. Qajet bolǵan jaǵdaida, memleket Qazaqstan musylmandary dini basqarmasyna qoldaý kórsetýge daiyn.
Men ózimniń maqalamda «Týǵan jer» baǵdarlamasyna erekshe kóńil bóldim. Ol bizge ár óńir, ár eldi meken týraly mol maǵlumat alýǵa múmkindik beredi. Árqaisymyzdyń júregimizde patriotizm bolýǵa tiis. Osy oraida óz ýaǵyzdaryńyzda Otandy súiý taqyrybyna airyqsha kóńil bólýlerińizdi suraimyz, – dep túiindedi Memleket basshysy.
Sondai-aq, kezdesýge qatysýshylar dástúrli emes dini aǵymdarǵa qarsy kúrestegi ózara is-qimyl máseleleri jónindegi oilaryn ortaǵa saldy.
