QR Densaýlyq saqtaý ministri Eljan Birtanov Qaýipsizdik Keńesiniń otyrysynda eldegi koronavirýspen bailanysty jaǵdai týraly esep berdi, dep habarlaidy "Ult aqparat" Elbasy.kz saityna silteme jasap.
Qaýipsizdik Keńesiniń tóraǵasy Nursultan Nazarbaev koronavirýs tóńiregindegi jaǵdai Qytai ekonomikasyna da, Qazaqstan ekonomikasyna teris áser etýi múmkin ekenin atap ótti.
«Biz qol qýsyryp otyrmaýymyz kerek. Barlyq jaǵdaiǵa daiyn bolyp, dári-dármek pen basqa da qajetti resýrstar qoryn qamtamasyz etý qajet. Bul másele baqylaýda bolýy kerek. Mundai jaǵdailarda jasalatyn sharalardy qarastyrý kerek. Onyń ishinde syrtqy faktordyń ulttyq ekonomikamyzǵa teris áserin boldyrmaýymyz kerek», - dedi Nursultan Nazarbaev.
Aita keteiik, elordada QR Tuńǵysh Prezidentiniń tóraǵalyǵymen Qaýipsizdik Keńesiniń otyrysy ótti. Jiyn barysynda Jambyl oblysy Qordai aýdanyndaǵy jaǵdai, biologiialyq qaýipsizdikti qamtamasyz etý jáne koronavirýstyq infektsiianyń taralýyna qarsy turý máseleleri qaraldy.
