Qazaqstannyń Tuńǵysh Prezidenti Nursultan Nazarbaev Koreia Respýblikasynyń Prezidenti Mýn Chje Inmen kezdesti, dep habarlaidy "Ult aqparat" Elbasynyń Baspasóz qyzmetine silteme jasap.
Áńgimelesý barysynda Elbasy Nursultan Nazarbaev mártebeli qonaqqa iltipat bildirip, eki memleket arasyndaǵy ekonomikalyq jáne saiasi yntymaqtastyqtyń tiimdiligin aitty.
– Sizben Qazaqstanda júzdeskenime qýanyshtymyn. Táýelsizdigimizdiń alǵashqy kúninen bastap Ońtústik Koreiamen jaqsy qarym-qatynas ornattyq. Biz ekonomikalyq jáne saiasi yntymaqtastyǵymyzdy jańadan qalyptastyrdyq. Sizderdiń jalpy Qazaqstanǵa jáne Ortalyq Aziiaǵa degen yqylastaryńyzdy joǵary baǵalaimyz, – dedi Qazaqstannyń Tuńǵysh Prezidenti.
Nursultan Nazarbaev Ońtústik Koreia men Korei Halyq Demokratiialyq Respýblikasy arasynda qol jetkizilgen koreiaralyq ýaǵdalastyqtardy júzege asyrýdyń mańyzdylyǵyn atap ótti.
– Sizder kúrdeli máselemen – Korei túbeginde beibitshilik pen ózara senim ornatý isimen ainalysyp jatyrsyzdar. Bul ońai emes, biraq bul – igilikti is. Sizderdiń kúsh-jigerlerińizge jan-jaqty qoldaý kórsetýge daiynbyz, – dedi Elbasy Nursultan Nazarbaev.
Ońtústik Koreia Prezidenti Qazaqstannyń Tuńǵysh Prezidentine júzdeskeni úshin rizashylyq bildirip, bul sapardyń ekijaqty bailanystardy damytý úshin mańyzdy ekenin aitty.
– Briýsselde ótken ASEM sammiti aiasynda kezdeskenimiz esimde. Sol kezde meni Qazaqstanǵa saparmen kelýge shaqyrdyńyz. Men bul saparǵa basa mán beremin. Óitkeni biyl eki el arasyndaǵy strategiialyq seriktestigimizdiń 10 jyldyǵyn atap ótemiz, – dedi Mýn Chje In.
Ońtústik Koreia Prezidenti Qazaqstannyń ekonomikalyq damý turǵysynan qol jetkizgen jetistikteriniń bári Nursultan Nazarbaevtyń kóregen saiasatynyń arqasy ekenin erekshe atap ótti.
Sondai-aq, Mýn Chje In Qazaqstannyń beibitshilik pen kelisim baǵytynda, sonyń ishinde iadrolyq qarýsyzdaný men ony taratpaý salasynda júrgizip jatqan saiasatyna toqtaldy.
Kezdesý sońynda Elbasy Nursultan Nazarbaev pen Ońtústik Koreia Prezidenti Mýn Chje In Qazaqstannyń Tuńǵysh Prezidenti kitaphanasynyń kórmesindegi ekspozitsiialarmen tanysty.
