- Korei kompaniialary Qazaqstandaǵy jekeshelendirýge qatysa alady. Bul týraly búgin Koreia Respýblikasyna memlekettik sapary aiasynda atalǵan eldiń jetekshi biznes ókilderimen kezdesken QR Prezidenti Nursultan Nazarbaev aitty, dep habarlaidy QazAqparattyń arnaýly tilshisi Seýlden.
Memleket basshysy koreilik biznesmenderge elimizde júrgizilip jatqan memlekettik baǵdarlamalar, kásipkerlikti qoldaý sharalary jaiynda aityp berdi. Sonymen qatar «Astana» halyqaralyq qarjy ortalyǵynyń qurylǵandyǵyn, onyń aǵylshyn quqyǵy negizinde jumys isteitindigin túsindirdi. Munan bólek, 2017 jyly elordada «Bolashaq energiiasy» taqyrybymen ótetin «EKSPO-2017» halyqaralyq mamandandyrylǵan kórmesine Koreia Respýblikasyn qosa alǵanda 100-den astam memleket pen 17 halyqaralyq uiymnyń qatysatyndyǵyn aitty jáne koreilik kompaniialardy osynaý sharaǵa belsene qatysýǵa shaqyrdy.
«Munan bólek, men sizderge jappai jekeshelendirý saiasatyn júzege asyryp jatqandyǵymyz jaiynda aitqym keledi. Bizdiń 800-den astam iri kompaniiamyz jekeshelendirýge shyǵaryldy. Ministrlikterimiz ben vedomstvolarymyz sizderge tolyqqandy aqparat bere alady. Biz koreilik kompaniialardy oǵan jáne jalpy biznesti qarjy ortalyǵy men indýstrialdy baǵdarlamalarǵa qatysýǵa shaqyramyz», - dedi Memleket basshysy.
Osy oraida Nazarbaev Qazaqstanda indýstrialandyrý baǵdarlamasy aiasynda 770 jańa kásiporyn qurylyp, 100 myńdaǵan jumys orny qurylǵanyn aitty. Al «Nurly jol» infraqurylymdyq damý baǵdarlamasy aiasynda elimizde 7 myń shaqyrym kólik, temir joldary, áýejailar, Kaspiide teńiz porty salynyp, jańǵyrtylatyndyǵyn atap ótti.
