Nursultan Nazarbaevtyń tóraǵalyǵymen «Nur Otan» partiiasy Saiasi keńesiniń keńeitilgen otyrysy ótti, dep habarlaidy "Ult aqparat" Elbasynyń resmi saityna silteme jasap.
Basqosýǵa Saiasi keńes Biýrosynyń músheleri, Úkimet músheleri, Májilis pen máslihattardaǵy fraktsiia ókilderi, partiianyń óńirlik filialdarynyń basshylary jáne olardyń orynbasarlary, bastaýysh partiia uiymdarynyń ókilderi qatysty.
Keńeitilgen otyrysta kún tártibine sáikes partiianyń sailaýaldy baǵdarlamasy men sezderde qabyldanǵan sheshimderdiń oryndalý barysy, partiia jumysyn jańǵyrtý jáne Saiasi keńes Biýrosynyń quramyna ózgerister engizý máseleleri talqylandy.
Elbasy el damýynyń strategiialyq maqsattaryna qol jetkizý úshin partiianyń qoǵamdy jumyldyrý úderisinde mańyzdy ról atqaratynyn atap ótti.
Nursultan Nazarbaev sailaý zańnamasyn reformalaý nátijelerine toqtalyp, qabyldanǵan proportsionaldy júie ozyq álemdik tájiribege sai keletinin jáne demokratiiany damytýǵa septigin tigizetinin aitty.
– Partiia problemalardy naqty sheshý joldaryn usynyp, tiimdi jumys isteýi kerek, sonda bedelimiz de artady, halyq ta qoldaidy. Ekonomika men saiasi damý baǵytynda kóshbasshy atanǵan elderdiń tájiribesinen sabaq alǵanymyz jón, – dedi Qazaqstannyń Tuńǵysh Prezidenti.
«Nur Otan» partiiasynyń Tóraǵasy aldaǵy sailaýdyń konstitýtsiialyq merzimde ótetindigin taǵy bir márte atap ótti.
– Qazir Úkimet pen búkil atqarýshy bilik bilek sybanyp, «Nur Otan» partiiasy men jańadan sailanǵan Prezident Qasym-Jomart Kemeluly Toqaevtyń sailaýaldy ýádelerin oryndaýǵa, adamdardyń naqty problemalaryn sheshýge tiis. Eń aldymen, óńirlerde jurtshylyqpen tyǵyz jumys isteý qajet, – dedi Elbasy.
Qazaqstannyń Tuńǵysh Prezidenti «Senim. Dialog. Bolashaqqa nyq qadam – «Nur Otan» partiiasynyń 7 serpini» atty partiia jumysyn júieli jańǵyrtý baǵdarlamasyn usyndy.
Atap aitqanda, Elbasy baǵdarlamaǵa sáikes partiianyń belsendi múshelerin toptastyrý, jemqorlyqpen kúresti kúsheitý jáne partiiadan laiyqty emes múshelerdi shyǵarý úshin sharalar qabyldaýdy, barlyq deńgeide partiia organdarynyń áleýetin meilinshe júzege asyrýdy, biliktiń barlyq deńgeiinde partiialyq jaýapkershilikti arttyrýdy tapsyrdy.
– Partiianyń Májilistegi fraktsiiasynyń jumysyn barynsha kúsheitý kerek. Bul partiia mindetterin oryndaýdyń jáne atqarýshy organdarǵa yqpal etýdiń negizgi tetigi. Fraktsiianyń mártebesin kóterý úshin onyń jetekshisi laýazymyna Májilis Tóraǵasy Nyǵmatýllin Nurlan Zairollaulyn sailaýdy usynamyn. Ol Májilistiń spikeri retinde alǵa qoiylǵan maqsattarǵa qol jetkizý jáne fraktsiia jumysyn qaita jandandyrý úshin barlyq resýrstardy jumyldyra alady, – dedi Elbasy.
Sonymen qatar, Nursultan Nazarbaev halyqpen naqty jumys isteý qaǵidatyn engizýdi, qarqyndy aqparattyq-ideologiialyq jumysty uiymdastyrýdy jáne partiia tóńiregine jastardy biriktirý úshin sharalar qabyldaýdy usyndy.
– Qazirgi tańda «jańa» media salasynda shyndyqqa janaspaityn aqparat taratýshy arnalar kóbeiip keledi. Jergilikti, qarapaiym máseleler respýblikalyq deńgeige deiin kóterilýde. Qoǵamdyq sanada jalǵan túsinik qalyptasýda. «Nur Otan» óziniń aqparattyq strategiiasyn túbegeili qaita qaraýy qajet. Partiianyń buqaralyq aqparat quraldary obektivti jáne jedel aqparat kózderine ainalyp, halyqtyń senimine ie bolýǵa tiis, – dedi partiia Tóraǵasy.
Sondai-aq, Qazaqstannyń Tuńǵysh Prezidenti el aldynda turǵan ekonomikalyq problemalarǵa toqtalyp, turaqty ósimdi qamtamasyz etetin jańa sharalar usyndy.
Atap aitqanda, Elbasy biznes úshin salyq aýyrtpalyǵyn tómendetý arqyly ekonomikaǵa salyqtyq yntalandyrý tetikterin engizýdi usyndy.
– Sondai-aq, biýdjet saiasatyn qaita qaraý qajet. Memlekettik satyp alýlar ashyq emes jáne sybailas jemqorlyq jappai beleń alǵan salaǵa ainaldy. Quny 1,8 trillion teńgeni quraityn memlekettik satyp alýlardyń 65 paiyzy bir kózden júzege asqan. Memlekettik satyp alýlar týraly zańdy ózgertý kerek, – dedi Nursultan Nazarbaev.
Sonymen birge, Qazaqstannyń Tuńǵysh Prezidenti belsendi saýda saiasatyn júzege asyrý jáne qarjy sektoryn turaqtandyrý sharalaryn qabyldaýdyń mańyzdylyǵyn atap ótti.
– Qazirgi tańda jasandy intellekt aldyńǵy qatarǵa shyqty. Ony tirshiliktiń barlyq salasyna engizý aýqymy jaǵynan ýrannyń bólinýi týraly jańalyqty ashýmen teń. Jasandy intellekt densaýlyq saqtaýdan bastap, óndiris pen qarjy sektoryna deiingi barlyq salany túgel transformatsiialaidy. Jasandy intellekt jańa álemdik tártip ornatyp, jańa jahandyq kóshbasshylar men aýtsaiderlerdi aiqyndaidy. Sondyqtan biz ony qoldaý úshin qazirden bastap aýqymdy jáne júieli sharalar qabyldaýymyz qajet, – dedi partiia Tóraǵasy.
Nursultan Nazarbaev jasandy intellektini jan-jaqty damytýǵa múmkindik beretin zańnamalyq baza ázirleýdi, sondai-aq, osy salany kásipkerlik jáne ǵylymi turǵydan qoldaý úshin ekojúie qalyptastyrýdy usyndy.
– Partiianyń kúndelikti jumysyn aitarlyqtai jandandyrý kerek. Biz úlken derekter men jasandy intellekt múmkindikterin paidalana otyryp, halyqtyń suranysyna aldyn ala jaýap berýdi úirenýimiz kerek, – dedi Elbasy.
Sonymen qatar, otyrys barysynda Partiia Saiasi keńesi Biýrosynyń jańa músheleri retinde «Egemen Qazaqstan» respýblikalyq gazetiniń basqarma tóraǵasy D.Qydyráli jáne «Jas Otan» jastar qanatynyń kóshbasshysy D.Káribek sailandy.
.jpeg)