Elordadaǵy Nursultan Nazarbaev halyqaralyq áýejaiynda Ashyq qosymshasy resmi túrde iske qosyldy, dep habarlaidy QazAqparat.
Áýejaida Ashyq qosymshasy apta basynan beri jumys istep tur. Aldyńǵy eki kúnde júie test rejiminde iske qosylǵan. Sol aralyqta 1 adamda «qyzyl» tústi, 4 adamda «sary» tústi mártebe anyqtalyp, ǵimarattyń kire berisinen keri qaitarylǵan.
Ashyq qosymshasynyń búginnen bastap resmi iske qosylýyna bailanysty barlyq kelýshige aldyn ala qosymshany júktep alyp, óz mártebesin tekserý qajet. Al jolaýshylar bilet satyp almai turyp mártebesin anyqtaý kerek.
Ashyq.kz qosymshasy arqyly kúidi tekserý úshin QR kod qoljetimdi. «Sary» jáne «qyzyl» tústi mártebesi bar jolaýshylarǵa terminal ǵimaratyna kirýge ruqsat berilmeidi. Áýejaiǵa kelýshi óz mártebesin aldyn ala mobildi qosymshany júktep alyp, Ashyq.kz saityna kirip úiden shyqpai turyp bile alady. Jolaýshynyń mártebesi «qyzyl» tústi ekeni áýejaida anyqtalsa, bilet quny qaitarylady. Ol úshin áýe kompaniiasyna júginý qajet. «Qyzyl» nemese «sary» statýs anyqtalǵan jolaýshylardy áýejaidyń óz algoritmi boiynsha sanitarlyq-epidemiologiialyq qyzmet ókilderine tapsyramyz. SES jáne politsiia qyzmetkerleri bizben birge 24 saǵat boiy jumys istep jatyr», - deidi áýejaidyń baspasóz hatshysy Ánýar Shalekenov.
Ashyq qosymshasyn júktegen adam óz statýsyn bilý úshin áýeli tildi tańdaýy kerek. Sodan keiin telefon nómiri boiynsha tirkeledi. Engizilgen nómirge kody bar SMS habarlama keledi. Sol kod arqyly tekserý jolyna ótip, jeke sáikestendirý nómirin (JSN) engizip, terminalǵa kirgen kezde QR kod beriledi. Osy QR kod arqyly jolaýshy mártebesi anyqtalady.
Al sheteldikter JSN ornyna pasport nómiri arqyly óz mártebesin anyqtai alady.
«Áýejaiǵa kelýshide Ashyq jobasyn ornatatyn smartfon bolmasa nemese mobildi qosymshany júktep úlgermese, áýejaidyń jaýapty qyzmetkeri óziniń mobildi qosymshasymen kelýshiniń JSN-sn engizý arqyly tirkeýge kómektesedi. Sol úshin qyzmetkerlerge 20 arnaiy planshet bóldik», - deidi Ánýar Shalekenov.
Ashyq jobasyn smartfonǵa júktep úlgermegen jolaýshylarmen sóilesip kórdik.
«Almatyǵa ushý úshin kelgen bolatynmyn. Ashyq qosymshasyn ornatyp úlgermegen edik. Kire beriste áýejai qyzmetkerleri JSN nómirim arqyly mártebemdi anyqtap, kedergisiz ótkizdi. Kórip turǵandaryńyzdai, eshqandai kezek keptelisine tap bolǵan joqpyn», - deidi Albina Altynbek esimdi jolaýshy.
Áýejai ókili Ánýar Shalekenov keshe ǵimarattyń kire berisinde kezek nege qalyptasqanyn túsindirdi.
«Ashyq qosymshasy búginge deiin test rejiminde jumys istegen edi. Sondyqtan tańǵy reis kezinde adam shoǵyry qalyptasty. Biraq búgin ol túitkildi joidyq. Áýejaidaǵy 4 kire beris te ashyq tur. Jolaýshylar men kelýshiler ǵana emes, áýejaidyń barlyq qyzmetkerleri ǵimaratqa tek Ashyq qosymshasy arqyly kiredi», - dedi Ánýar Shalekenov.
