Nursultan Nazarbaev Kemerevoda bolǵan qaiǵyly oqiǵaǵa bailanysty Resei Federatsiiasynyń prezidenti Vladimir Pýtinge kóńil aitý jedelhatyn joldady, - dep habarlaidy "Ult aqparat" Aqordaǵa silteme jasap.
"Memleket basshysy Kemerovo qalasynyń saýda jáne oiyn-saýyq ortalyǵyndaǵy órt saldarynan kóp adamnyń qaza tapqany týraly habardy zor kúizelispen qabyldady.
«Qazaqstan halqynyń jáne jeke ózimniń atymnan qaza bolǵandardyń týystary men jaqyndarynyń qaiǵysyna ortaq ekenimdi jetkizýińizdi suraimyn.
Zardap shekkenderdiń tezirek saýyǵyp, otbasylaryna oralýyna tilektestik bildiremin»", - delingen jedelhatta.
Sońǵy málimetterge qaraǵanda, órt saldarynan zardap shekkenderdiń sany 51 adamǵa jetti. Olardyń 12-si - aýrýhanada. Ekeýi aýyr jaǵdaida jatyr. Sondai-aq, 9 balanyń qaza bolǵany aitylady.
Eske sala keteiik, osyǵan deiin tótenshe jaǵdaidan keiin 64 adamnyń joǵalyp ketkeni, olardyń 41-i balalar ekeni habarlanǵan edi.
