Búgin QR Tuńǵysh Prezidenti Nursultan Nazarbaevtyń tóraǵalyǵymen Qaýipsizdik Keńesiniń otyrysy ótti, dep habarlaidy "Ult aqparat" Elbasy.kz saityna silteme jasap.
Beinekonferentsiia rejiminde ótken kezdesý barysynda koronavirýs indetine qarsy kúrestegi strategiialyq máseleler, sondai-aq el ekonomikasyn qalpyna keltirý jáne daǵdarystan keiingi kezeńde damý máseleleri qaraldy.
Elbasy jahandyq qaýip-qaterler tóńiregindegi jaǵdai alańdatarlyq stsenarii boiynsha damyp jatqanyn atap ótti.
– Koronavirýstyń saldary álemdik ekonomikanyń mańyzdy júielerine áser etýde. Halyqaralyq valiýta qorynyń sarapshylary qazirgi «Jahandyq karantindi» ótken ǵasyrda bolǵan Uly depressiiamen salystyrýda. Olardyń pikirinshe, jan basyna shaqqandaǵy tabys kólemi 170 elde tómendeidi. Ekonomikasy álsiz elder kóbirek zardap shegetin bolady. Sarapshylar osy toqsanda pandemiia men ekonomikalyq daǵdarystyń sharyqtaý shegi qatar keledi degen boljam jasap otyr. Ónerkásiptik óndiristiń quldyraýy Ekinshi dúniejúzilik soǵystan keiingi kezeńdegi eń tómen deńgeige jetýi múmkin, - dedi Qazaqstannyń Tuńǵysh Prezidenti.
Nursultan Nazarbaev jaqyn arada álemniń barlyq memleketteri budan da aýyr synaqtarǵa tap bolatynyn jáne onyń bári Qazaqstandy da ainalyp ótpeitinin aitty.
– 20 sáýirde munai baǵasy buryn-sońdy bolmaǵan deńgeige túsip ketti. Álemdik naryqtardyń teńgerimi buzyldy. Pandemiianyń sońy jáne óndiristiń jappai quldyraýy jahandyq qarjy daǵdarysyna ulasady degen de boljam bar. Kelesi kezeń – álemdik azyq-túlik daǵdarysy bolýy múmkin. Bul shielenister men qaqtyǵystarǵa ákelýi yqtimal, - dedi Elbasy.
Qaýipsizdik Keńesiniń Tóraǵasy kúrdeli kezeńdi tabysty eńserýde qazirden bastap qolǵa alynǵan is-sharalar mańyzdy ról atqaratynyn atap ótti.
– Memleket basshysy men Premer-Ministr daǵdarysqa qarsy qajetti barlyq sheshim qabyldady. Elimizde tótenshe jaǵdai jariialanyp, karantin rejimi engizildi. Men barlyq azamattardy tótenshe jaǵdai kezinde tiisti talaptardy oryndaýǵa shaqyramyn. Tarihymyzda mundai aýyrtpalyqtar talai ret bolǵan. Biraq osy jolǵy qiyndyqtyń orny bólek. Árbir qazaqstandyq memlekettiń qamqorlyǵyn sezinýi úshin qoldan kelgenniń bárin jasap jatyrmyz. Sonymen qatar qazir biz aldyn-ala qamdanýymyz kerek. Álemniń burynǵydai bolmasy anyq, - dedi Qazaqstannyń Tuńǵysh Prezidenti.
Qaýipsizdik Keńesiniń Tóraǵasy memleket pen qoǵamda bolatyn ózgeristerge de toqtaldy.
– Birinshiden, barlyq el ózderiniń ekonomikalyq strategiialaryn qaita qarap jatyr. Munda ózin-ózi qamtamasyz etý, ózine tiesli resýrstarǵa úmit artý, óndiris pen qarjylyq tizbektiń senimdiligi alǵashqy orynda bolady. Ekinshiden, jańa salalyq basym baǵyttar qalyptasady. Tiimsiz sektorlar múlde joiylyp ketedi. Ekonomikalyq ósimniń kóshin tyń salalar bastaiyn dep tur. Olar ekonomikany ilgeriletip, adamdardy jumyspen qamtidy. Úshinshiden, barlyq aýqymdy daǵdarystar tehnologiialyq jáne ekonomikalyq álemdik tártiptiń tsikldik ózgerýimen bailanysty. Qazir eski modeldiń kúiregenin kórip otyrmyz, - dedi Nursultan Nazarbaev.
Elbasy jahandyq syn-qaterlerdi eńserý úshin Qazaqstanda barlyq qajetti resýrstar bar ekenin atap ótti.
– Ótken jyldary biz shikizatqa táýeldilikti azaitý úshin tabandy jumys istedik. Sondyqtan damýdyń barlyq negizgi baǵyttary boiynsha arnaiy baǵdarlamalar ázirlendi. Indýstriialandyrý, shaǵyn jáne orta biznesti damytý, infraqurylymdyq damý, aýyl sharýashylyǵy, áleýmettik baǵdarlamalar júzege asyryldy. Olarǵa úlken resýrs bólindi. Biz Ulttyq qorǵa qomaqty qarajat jinadyq. Endi daǵdarys kezinde onyń elge paidasy tiip jatyr. Alaida qordaǵy qarjy sheksiz emes, ony únemdi jáne eń qiyn jaǵdaida ǵana paidalaný kerek, - dedi Qazaqstannyń Tuńǵysh Prezidenti.
Qaýipsizdik Keńesiniń Tóraǵasy áleýmettik-ekonomikalyq damýda erekshe ádis-tásilderdi qoldanýdyń mańyzdylyǵyn atap ótti.
– Birinshi kezekte daǵdarysqa qarsy keshendi sharalardy júzege asyrýymyz kerek. Kórsetilip jatqan kómektiń biznes pen halyqqa jetýi úshin bólingen ár teńgeni qadaǵalaý qajet. Qazirdiń ózinde ekonomikany qalpyna keltirý jáne daǵdarystan keiingi kezeńde damý baǵdarlamasyn iske asyrýǵa kirisken jón. Ekonomikanyń negizgi salalarynyń, bolashaq ekonomikasynyń, qarjy jáne áleýmettik salanyń, qalalar men aýyldardyń damý baǵyttaryn anyqtap alý mańyzdy, - dedi Nursultan Nazarbaev.
Elbasy daǵdarysqa qarsy sharalardy júzege asyrý úshin barlyq deńgeidegi memlekettik organdardyń tiimdi jumysyn qamtamasyz etý qajettiligine toqtaldy.
– Qazaqstandy tiimdi korporatsiia retinde qarastyratyn sát týdy. Ol strategiialyq ári operatsiialyq naqty josparǵa sáikes biryńǵai ortalyqtan basqarylýǵa tiis. Aýyl ákiminen bastap Úkimet múshesine deiingi memlekettik qyzmetshiniń bári óz jumysyn qaita pysyqtap, naqty nátijelerge qol jetkizýi qajet. Elge ekonomikany qalpyna keltirý, jumyssyzdyqty azaitý, halyqty azyq-túlikpen jáne qajettiniń bárimen qamtamasyz etý úshin tiimdi ári batyl sheshim qabyldai alatyn menedjerler kerek, - dedi Qazaqstan Respýblikasynyń Tuńǵysh Prezidenti.
Qorytyndylai kele, Qaýipsizdik Keńesiniń Tóraǵasy 2020 jylǵy daǵdarystan keiingi elimizdiń damý jolyn der kezinde oilastyrý bul qiyndyqty jeńip shyǵýǵa kómek berip qana qoimai, búkil memleket úshin paidasy tietindigin atap ótti.
– Biz bul daǵdarysty da jeńetinimizge senimdimin. Ákimder men ministrler tikelei jaýap beredi. Úkimet barlyq memlekettik baǵdarlamalar men daǵdarysqa qarsy is-sharalardyń tiimdi oryndalýyn baqylaýdy qamtamasyz etýi qajet. Men barsha qazaqstandyqtardy qabyldanǵan sharalardy qoldaýǵa, birlikke jáne tártipti saqtaýǵa shaqyramyn. Munyń bári halyqtyń múddesi úshin jasalyp jatyr, – dedi Nursultan Nazarbaev.
