QR Prezidenti Nursultan Nazarbaev «Jas Otan» jastar qanatynyń IV sezine óz quttyqtaýyn joldady. Ony sezd delegattaryna Memlekettik hatshy Gúlshara Ábdiqalyqova oqyp berdi, dep habarlaidy QazAqparat tilshisi.
«Jas Otan» - elin, jerin súietin, óz bolashaǵyn Qazaqstannyń kemel keleshegimen bailanystyratyn myńdaǵan bilimdi de, belsendi jastardyń bastaryn biriktiretin, meniń barlyq bastamalarym men strategiialyq josparlarymnyń senimdi tiregi bolyp kele jatqan bedeldi uiym. Táýelsizdiktiń alǵashqy jyldarynan bastap jastar máselesi meniń de, memlekettiń de eń basty nazarynda bolyp, bul salada kóptegen baǵdarlamalar júzege asty. Men osynaý eńbektiń jemisi men qamqorlyqtyń jylýyn jastardyń jaqsy biletinine kámil senemin. Qazir búkil álem aýqymdy ózgeristerdi bastan keshirýde. Tórtkúl dúnie tórtinshi ónerkásiptik revoliýtsiia dáýirine qadam basty. Biz uzaq merzimdi maqsattarymyzǵa qol jetkizý úshin osyndai qarqyndy ózgeristerdi de paidamyzǵa sátti júzege asyrýymyz qajet. Sol úshin biz Qazaqstanda saiasi-ekonomikalyq, rýhani jáne áleýmettik jańǵyrýlardy qolǵa aldyq», - delingen Memleket basshysynyń quttyqtaý hatynda.
Prezident «Bolashaqqa baǵdar: rýhani jańǵyrý» baǵdarlamasyna erekshe toqtalǵan. Sebebi atalǵan qujatta ulttyq sana men taiaý jyldary qolǵa alýdy qajet etetin mindetter belgilengen. Sonyń ishinde latyn álipbiine kóshý, tsifrlyq tehnologiialar, úsh tildi bilim berý jáne taǵy basqa mańyzdy maqsattar bar. Al «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» atty biylǵy Joldaýda jańa zaman talaptaryna beiimdelý men joǵary jetistikterge jetýdiń joldary kórsetildi. Bes áleýmettik bastama da biraz máselelerdi sheshýge múmkindik beredi.
«Osynyń barlyǵynda men jastardyń sapaly bilim alyp, básekege qabiletti maman bolyp qalyptasýyna erekshe kóńil bólip, soǵan basymdyq berdim. Óitkeni sender - elimizdiń erteńi ǵana emes, men aiqyndaǵan maqsattardy júzege asyratyn býynsyńdar. Men senderdi belsendi túrde jan-jaqty damýǵa, sportpen, ónermen ainalysýǵa, shet tilderdi úirenýge, otandyq jáne álemdik ádebiettiń tereń muralaryn tanyp-bilýge, eń bastysy, árqaisyńdy óz salalarynda álemniń eń ozyq mamandarymen iyq tirestirip, qatar tura alatyndai deńgeige kóterilýge shaqyramyn. Sender ata-babalarymyzǵa arman bolǵan, bizdiń býynymyz qalaǵan Táýelsizdikti baiandy etip, bizdiń jeńisti jolymyzben jasampaz dástúrimizdi laiyq jalǵastyrýǵa tiistisińder. «Jańa álemge jol salamyz» degen sezdiń ataýy da jastarymyzdyń jańashyldyqqa degen umtylysyn ańǵartyp, kóńilge qýanysh uialatady. Men senderdiń tyń bastamalaryńdy árqashan qoldaimyn. Endeshe jańa álemge salǵan joldaryńyz árdaiym ashyq ári dańǵyl bolsyn!».
Aita keteiik, keshe Astanada «Jas Otan» jastar qanatynyń IV sezi bastaldy. Sezd aiasynda uiymdastyrylǵan arnaiy konferentsiiada delegattar ortalyq keńestiń múshelerine daýys berip, uiymnyń jańa jarǵysyn qabyldady.
.jpeg)