Qazaqstan Respýblikasynyń Tuńǵysh Prezidenti Nursultan Nazarbaevtyń el táýelsizdiginiń 30 jyldyǵyna arnalǵan saltanatty jiynda sóilegen sózi jariialandy, dep habarlaidy Elbasynyń resmi saity.
***
Qymbatty otandastar!
Ardaqty aǵaiyn!
Qadirli halqym!
Eń asyl qundylyǵymyz – qasterli Táýelsizdiktiń 30 jyldyq torqaly toiymen barshańyzdy shyn júrekten quttyqtaimyn!
Qurmetti Qasym-Jomart Kemeluly, Sizge mazmundy baiandamańyz ben meniń el basqarǵan kezdegi eńbegime bergen asa joǵary baǵańyz úshin zor rizashylyq bildiremin.
* * *
Tuńǵysh Prezident retinde kún-tún demei eldiń taǵdyr-talaiyn oilap, týǵan halqymmen birge tynymsyz ter tókken, tolassyz ýaiym keshken kezderdiń ár sáti meniń jadymda óshpestei jazýly.
«Aq túieniń qarny jarylǵan» aqjoltai kún, azattyq alǵan shaǵymyz dál keshegidei kóz aldymda.
Egemen elimizdiń derbes dáýiri, saltanatty sapary sol tarihi oqiǵadan bastalǵan edi.
Babalarymyz ǵasyrlar boiy ańsaǵan arman aqiqatqa ainaldy.
Táńirge táýbe, kózdegenimiz ben kóksegenimizge jettik!
Kókten tilegenimiz ben kópten kútkenimiz boldy.
Ketken esemizdiń, shekken zardabymyz ben kemshin-kemisimizdiń orny toldy.
Árýaq qoldady, ádilet ornady:
«Myń ólip, myń tirilgen» qasietti halqymyz qaita túledi.
Myńjyldyqtar toǵysar tusta baiyrǵy memlekettigimiz qaita jańǵyrdy.
* * *
Otyz jylda elimiz tutas ǵasyrǵa tatityn uly joldan ótti.
Osy tarihi kezeńde biz baǵyndyrǵan belester – Táýelsizdik dáýiriniń bir-bir bederli biigi deýge laiyq.
Barlyǵyn túiindei kelgende, eń basty jetistigimiz – biz Qazaqstandy álem moiyndaǵan memleket retinde qalyptastyryp, eńseli elge ainaldyrdyq.
Búginde jahan jurtshylyǵy Qazaq jerin – beibit meken, Qazaq elin – mártebeli memleket, senimdi seriktes retinde tanidy.
Mundai bedelge tek rýhy kúshti, judyryqtai jumylǵan birligi bekem halyq qana ie bola alady.
Bir úidiń balasyndai, bir qoldyń salasyndai yntymaǵy jarasqan jurtymyzdyń úlken-kishisine sol úshin shynaiy alǵysymdy arnaǵym keledi.
Osy oraily sátte, azattyq alýdyń aýyr júgin birge kóterisken aldyńǵy-keiingi serikterime de arnaiy rahmet aitamyn.
* * *
Taiaýda «Táýelsizdik taǵylymy» atty maqalam jaryq kórgenin bilesizder.
Ondaǵy elim dep emirenýden, Táýelsizdik dep tebirenýden týǵan ózekjardy oilarym men tarihi oqiǵalardy qaitalaýdyń qajeti joq shyǵar.
Tek almaǵaiyp zamanda azýly men tistiniń, kúshti menen sustynyń oljasy bolyp ketýden ońai nárse joq ekenin ǵana eske salyp ótkim keledi.
Sondyqtan jahandaný jalynyna jutylyp ketpei, ulttyq jańǵyrýdyń negizin birlese nyqtaýymyz qajet.
* * *
Osydan otyz jyl buryn Tuńǵysh Prezident retinde qyzmetime kiriser aldyndaǵy saltanatta maǵan halqymyzdyń abyz aqsaqaly Shákir Ábenov dana babalar dástúrimen:
Tar asý, taiǵanaq jol, ker beleste,
El tizginin nyq ustar sen emes pe?!
Halqyń súigen perzenti bol deituǵyn,
Qart atań toqsan birde men emes pe?!
– dep aq batasyn bergen bolatyn.
Bataǵa qosa halyqtyń keleshekke degen úmiti men arman-tilegin jetkizip, amanat júktegeni áli esimde.
Ózim basshylyq etken otyz jylǵa jýyq ýaqyt boiy men halqymnyń seniminen shyǵýǵa bar kúsh-jigerimdi jumsap, sanaly ǵumyrymdy el igiligi úshin aianbai qyzmet etýge arnadym.
Eńbegim aqtaldy dep oilaimyn.
Otanymyz Qazaqstan Respýblikasy Ortalyq Aziianyń kóshin bastap, TMD elderiniń tórine jaiǵasty.
Alpaýyt eldermen úzeńgi qaǵystyryp, ozyq memlekettermen teń dárejede yntymaqtastyq ornatty.
* * *
Jyr alyby atanǵan babamyz Jambyl Jabaev kezinde: «Jambyl – meniń jai atym, halyq – meniń shyn atym», – depti ǵoi.
Búginde eńbegimdi elegen el-jurtym meni óziniń atyna ortaqtastyryp, «Elbasy» degen mártebe berdi.
Óz basym «El maǵan emes, kerisinshe men elime ne beremin?» deýmen kele jatqan adammyn.
Budan da keiin, aqyrǵy demime deiin týǵan elimniń tynys-tirshiligine alańdaýmen óterim anyq.
* * *
Eń qiyn da kúrdeli sheshimder qabyldar sátterde men árdaiym qalyń elime, qara orman halqyma arqa súiedim.
Maǵan árdaiym senim artyp, barlyq bastamalaryma qoldaý kórsettińizder.
Sol úshin barshańyzǵa taǵy da rahmet!
* * *
Biz – tekti halyqtyń urpaǵymyz.
Ǵasyrlar boiy batyr babalar ulan baitaq jerdi aq bilektiń kúshimen, aq naizanyń ushymen qorǵap, bizge miras etti.
Men sol ata-babalar amanatyna árdaiym adal boldym.
«El basyna kún týsa, er etikpen sý kesher» degendei, jurtymnyń jarqyn bolashaǵy úshin janymdy aiamadym.
Búgin, arada 30 jyl ótken soń, sol asqaq armandarymnyń oryndalǵanyn kórý – men úshin zor baqyt.
Jetken barlyq biikter – bizdiki jáne bárimizdiki.
Ony eshkim de joqqa shyǵara almaidy.
Men orda buzar jasqa endi tolǵan Qazaqstannyń bolashaqta qazirgiden de qýatty, álemge áigili memlekettiń biri jáne biregeiine ainalǵanyn qalaimyn ári soǵan senemin.
* * *
Qazirgi kúni biz aldymyzǵa ozyq 30 el qataryna qosylý jóninde órshil maqsat qoiyp otyrmyz.
«Armansyz adam – qanatsyz qus» degendei, elimizdi órkendetý jolynda bizge eshqashan toqmeiilsýge, toqtap qalýǵa bolmaidy.
Jer kólemi jóninen álemde 9-shy oryn alatyn elimiz basqa da barlyq baǵyt boiynsha bolashaqta ozyq 10 memleket qataryna qosylsa dep armandaimyn.
Uly murat jolyna belin bailaǵan ultymyz, maqsatker de jasampaz jurtymyz barda sol armanymnyń oryndalaryna sengim keledi.
Ardaqty áleýmet!
Bardy baǵalaǵan – ozady, joqty qýalaǵan – tozady.
Táýelsizdikten qymbat qundylyq, egemendikten asqan bailyq joq.
Biz basymyzǵa baq bolyp qonǵan azattyqty aialai bilýimiz kerek.
«Tirlik basqa bolsa da – tilek bir, Barmaq basqa bolsa da – bilek bir» degen atadan qalǵan ulaǵatty sóz bar.
Táýelsizdikti jariialap, turlaýly etý bizdiń býynǵa buiyrǵan baqyt ári kieli borysh boldy.
Al sol Táýelsizdikti qorǵaý men el yrysyn eseleý – keler urpaqqa, jastarymyzǵa asyl paryz ári amanat.
Zamanaýi bilimmen qarýlanǵan búgingi jas tolqyn Táýelsizdiktiń jańa jylnamasyn jazyp jatyr.
Qazirgidei aýmaly-tókpeli ýaqytta bárin tek bilim, ǵylym, taýdai talap pen tabandy izdenis arqyly ǵana tolyq igerip, bekem baǵyndyrýǵa bolady.
Osy oraida, men táýelsizdik urpaqtaryna – jastarǵa zor úmit artamyn jáne aq batamdy beremin.
Qurmetti qazaqstandyqtar!
Bizge aldaǵy ýaqytta beibitshilikti jaqtaityn saiasatymyz ben halyqtyń ál-aýqatyn jaqsartý baǵytyndaǵy igi áreketterimizdi jalǵastyra berý kerek.
Kópshilik halyqtyń qoldaýymen resmi joǵary bilik tizginin qolyna alǵan Memleket basshysy Qasym-Jomart Kemeluly Toqaev búginde strategiialyq baǵdarymyzdy laiyqty jalǵastyryp, eldi tiimdi basqaryp keledi.
Eli erine sengen, eri eline súiengen joraly jurtymyzdyń erteńi budan da jarqyn bolaryna kúmánim joq.
* * *
Yntymaq pen birlikti tý etken el kez kelgen tar jol, taiǵaq keshýden súrinbei ótetini anyq.
Ony otyz jylda ózgege de, ózimizge de daýsyz dáleldedik.
Endeshe, eldiktiń altyn arqaýyndai ulttyq aýyzbirligimizdi ardaqtap, Táýelsizdikti kózdiń qarashyǵyndai saqtaýymyz kerek.
Sondyqtan árdaiym tuǵyrymyz – tynyshtyq, tilegimiz tatýlyq bolýǵa tiis.
Qymbatty otandastar!
Táýelsizdiktiń 30 jyldyǵy – jasampaz Qazaqstan tarihynyń jańa bir belesi.
Elimiz máńgilikke baǵyt ustaǵan uzaq joldyń áli de basynda dep sanaimyn.
Ult bolyp attanǵan sol uly joldaǵy alysty kózdegen saparymyz sátti bolsyn!
Barshamyzdy babalar arýaǵy qoldap, halqymyzdy beibitshilik pen berekeden aiyrmasyn.
HHI ǵasyr Qazaqstannyń «altyn ǵasyryna» ainalsyn.
Táý eter kiemiz – Táýelsizdik jasasyn!
Egemendigimiz baiandy, eldigimiz máńgi bolsyn!
