Elbasy dástúrli túrde «Atameken» etnomemorialdy kesheni alańynda eldiń joǵary áskeri oqý oryndarynyń túlekterine ofitserlik shen tapsyrady, dep habarlaidy QazAqparat.
Budan buryn habarlanǵandai, Memleket basshysy Nursultan Nazarbaev Astana kúnin merekeleý aiasynda Memlekettik týdy kóterý saltanatty rásimine qatysty.
«Jelbiregen kók týymyzdyń astynda búgin bizdiń elordamyzdyń jiyrma jyldyń mereitoiyna arnalaǵan barlyq sharalardy bastaǵaly otyrmyz. Elordamyzdyń 20 jyldyq merekesimen shyn júregimnen barshalaryńyzdy quttyqtaimyn. Biyl dástúrli merekemiz Astanamyzdyń jiyrma jyldyǵyna týra kelip tur. 20 jyl degen tarih úshin qasqaǵym sát. Barsha álemde eki ǵasyrdyń toǵysynda en dalada qala salǵan jalǵyz el - ol Qazaqstan», - dedi Nursultan Nazarbaev.
Osy oraida, Prezident jiyrma jyldyń ishinde búkil Astanamyz Qazaqstandy álemge pash etkenin, elordada túrli dúniejúzilik uiymdardyń jinalystary ótkizilip jatqanyn eske salyp ótti.
«Qazaqstan, Táýelsizdik, Astana - úsh uǵymy birdei. Bizdiń jalǵyz Otanymyz bar - ol Qazaqstan. Bizdiń oryndalǵan armanymyz - ol Táýelsizdik. Bizdiń eshbir eldiń týyna uqsamaityn kók bairaǵymyz bar. Ol Birikke Ulttar Uiymynan bastap, barlyq sheteldegi elshilikterde, úlken sharalarda jelbirep tur. Biz jylda dástúr boiynsha Astanada Memlekettik týdy kóterip kelemiz», - dedi Prezident.
Sonymen qatar, Memleket basshysy - Qazaqstan Respýblikasy Qarýly Kúshteriniń Joǵarǵy bas qolbasshysy eldiń joǵary áskeri oqý oryndarynyń 12 túlegine ofitserlik shen tapsyrady.
«Dál osy mezgilde áskeri joǵary oqý oryndaryn bitirgen jas ulandarǵa eń birinshi ofitserlik shen tapsyrǵaly otyrmyz. Meniń oiymsha, osy oqý oryndaryn támamdaǵan úzdik jastarǵa ofitserlik shendi tapsyra otyryp, barlyq áskeri joǵary oqý oryndarynyń jastaryn shyn júregimnen quttyqtaimyn. Bul jas ofitserlerge kóp úmit artamyz. Otanymyzdyń tynyshtyǵy, elimizdiń shekarasynyń beriktigi, elimizdiń tutastyǵy Qarýly Kúshterdiń qolynda. Barlyqtaryńyzǵa sáttilik pen myqty densaýlyq tileimin», - dedi Elbasy.
.jpeg)