Nursultan Nazarbaev Qazaqstanǵa resmi saparmen kelgen Grýziia Prezidenti Georgii Margvelashvilimen kezdesti, - dep habarlaidy "Ult aqparat" Aqordaǵa silteme jasap.
Memleket basshysy Grýziia Prezidentiniń sapary aitýly oqiǵalarǵa – elderimiz arasyndaǵy diplomatiialyq qatynastardyń 25 jyldyǵyna jáne «EKSPO-2017» halyqaralyq kórmesiniń ashylýyna tuspa tus kelip otyrǵanyn atap ótti.
– Sizdiń osy saparyńyzǵa jáne Grýziianyń kórmege qatysqanyna dán rizamyz. Bizdiń qarym-qatynastarymyz árkezde de jaqsy boldy. Elderimiz táýelsizdiktiń alǵashqy jyldarynda bir-birine jan-jaqty kómek kórseti. Qazaqstan Grýziia ekonomikasynyń negizgi investorlarynyń birine ainaldy. Ekijaqty qatynastardy odan ári jaqsartýǵa eshqandai da kedergi joq. Bul turǵyda Sizdiń saparyńyzdyń mańyzy zor, – dedi Nursultan Nazarbaev.
Grýziia Prezidenti elimizdiń damý qarqynyna qyzyǵýshylyq tanytyp, Qazaqstanǵa kelýge kópten yqylasty bolǵanyn aitty.
– Sizdiń jáne halqyńyzdyń qiyndyqqa toly osy jyldarda aýqymdy jumys atqarǵandaryńyzdy qazir óz kózimmen kórip otyrmyn. Grýzin halqy Sizdiń elińiz ben jeke ózińiz tarapynan kórsetilip jatqan qoldaýǵa rizashylyq bildiredi jáne ony baǵalai biledi. Grýziianyń «EKSPO-2017» kórmesine qatysýy asa mańyzdy dep sanaimyn. Biz onda óz ekonomikamyzdyń jetistikterin kórsetip, dástúrli tatý kórshilik bailanystarymyzdy jalǵastyra alamyz, – dedi G.Margvelashvili.
Sondai-aq Grýziia Prezidenti ekonomikalar yntymaqtastyǵynyń tujyrymdamasyna óz eliniń belsene qatysyp, halyqtar arasyndaǵy dialogty damytýǵa jaǵdai jasap otyrǵanyn atap ótti.
– Sizdiń osy baǵytta orasan zor jumys atqaryp júrgenińizdi bilemin. Bizdiń elderimiz táýelsizdikke qol jetkizgen sátten beri dál osy baǵytta damyp keledi, – dedi G.Margvelashvili.
Sońynda Grýziia Prezidenti Nursultan Nazarbaevqa uzaq jyldardan bergi qoldaýy úshin zor alǵys bildirip, Astanadan alǵan áserleri jóninde aitty.
.jpeg)