Búgin QR Prezidenti Nursultan Nazarbaevtyń tóraǵalyǵymen Qaýipsizdik keńesiniń otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Qaýipsizdik keńesiniń otyrysynda 2017-2020 jyldarǵa arnalǵan Ulttyq qaýipsizdik strategiiasyn iske asyrý máseleleri, sondai-aq Ońtústik Qazaqstan oblysyndaǵy qoǵamdyq-saiasi jáne áleýmettik-ekonomikalyq ahýal qarastyryldy.
Memleket basshysy byltyr qabyldanǵan Ulttyq qaýipsizdik strategiiasy týyndaityn qaýipter men syn-qaterlerdi anyqtaýǵa jáne olarǵa ýaqtyly toitarys berý sharalaryn qoldanýǵa múmkindik beretinin atap ótti.
– Byltyr biz ulttyq qaýipsizdikti qamtamasyz etý salasynda baǵdarlamalyq qujat qabyldadyq. Ulttyq qaýipsizdik qorǵanys nemese ishki saiasatta ǵana emes, sonymen qatar ekonomika, óskeleń urpaqqa tárbie berý jáne basqa da barlyq salalarda qamtamasyz etilýge tiis, – dedi Qazaqstan Prezidenti.
Budan bólek, jiyn barysynda Ońtústik Qazaqstan oblysynyń áleýmettik-ekonomikalyq damý deńgeiin kóterý, jańa jumys oryndaryn ashý, infraqurylymdy jetildirý, sondai-aq apatty jaǵdaidaǵy mektepterdi qalpyna keltirý, jańa mektepter salý jáne óńirdegi dini ekstremizmge qarsy is-qimyl máseleleri talqylandy.
Otyrys qorytyndysy boiynsha Memleket basshysy ortalyq memlekettik jáne jergilikti atqarýshy organdarǵa birqatar naqty tapsyrma berdi.
