Qazaqstan Prezidenti elimizge saparmen kelip, «EKSPO-2017» halyqaralyq kórmesinde Ispaniia pavilonynyń ashylýyna qatysqany úshin A.Pastorǵa alǵys aitty, dep habarlaidy "Ult aqparat" Aqordanyń baspasóz qyzmetine silteme jasap.
– Kórmemizdiń ashylý saltanatyna 17 shet memleketter jáne úkimetter basshylarymen birge, Ispaniia Koroli VI Felipe de qatysqan bolatyn. Biz osy is-shara aiasynda júzdestik. Asa mártebeli Ispaniia Koroli Qazaqstanǵa qyzyǵýshylyq tanytyp, birqatar iskerlik kezdesý ótkizdi, – dedi Memleket basshysy.
Nursultan Nazarbaev elderimiz arasynda ekijaqty dostyq qarym-qatynas ornaǵanyn, ekonomika men saiasattaǵy bailanystarymyz jemisti damyp kele jatqanyn aityp, halyqaralyq kún tártibindegi máseleler boiynsha ustanymdarymyz uqsas ekenine toqtaldy.
– Qazaqstanǵa sapary kezinde Asa mártebeli Ispaniia Korolimen birge Ispaniianyń isker toptar ókilderi men úkimet músheleri keldi. Olar Qazaqstandaǵy áriptesterimen jemisti kelissózder ótkizdi, – dedi Qazaqstan Prezidenti.
Memleket basshysy Ispaniia Koroli VI Felipe men úkimetine joǵary marapaty úshin jyly lebizin bildirip, Korol I Hýan Karlos pen onyń jubaiy Sofiia Patshaiymǵa amandyq jáne tabys tiledi.
Ispaniia Koroldigi Depýtattar kongresiniń tóraiymy memleketterimiz arasynda dostyq qarym-qatynas ornaǵanyn aityp, Ispaniia delegatsiiasyna dástúrli túrde qonaqjailyq kórsetkeni úshin rizashylyq bildirdi.
– Men Sizdiń elińizdi damytý men órkendetý jolyndaǵy qyzmetińiz, kúsh-jigerińiz týraly alǵash ret Ispaniia Koroli I Hýan Karlostan estidim. Dál sol kezde Ispaniia Koroli I Hýan Karlos Qazaqstandaǵy áriptesterimizben iskerlik bailanystar ornatý qajettigin aitqan bolatyn. Búginde Qazaqstan Sizdiń arqańyzda zor tabysqa qol jetkizip otyr, – dedi A.Pastor.
Budan bólek, Ispaniia Koroldigi Depýtattar kongresiniń tóraiymy Qazaqstan Prezidentine Ispaniia Koroldigi otbasynyń shynaiy lebizin jetkizdi.
