Nursultan Nazarbaev Samarqan qalasyna baryp, Ózbekstannyń jýyrda marqum bolǵan prezidenti Islam Karimov jerlengen orynǵa gúl shoǵyn qoidy. Bul týraly Aqordanyń resmi saity habarlady.
Memleket basshysy jinalǵandarǵa arnaǵan sózinde Islam Karimovpen ekeýin uzaq jyldar boiy berik dostyq, shynaiy túsinistik, ózara tileýlestik bailanystyryp kelgenin aitty.
– Ózbekstandyqtardyń keler urpaǵy, memleket qyzmetindegi basshylardyń kelesi býyny Islam Karimovty árdaiym este saqtaidy dep senemin. Onyń artta qalǵan mol murasyn, memlekettik qyzmetiniń nátijelerin urpaq zerttep-zerdelep, atqarǵan isterin ózbek halqynyń tarihyna altyn áriptermen jazady. Ol búkil álemge tanymal kóshbasshy boldy, el ekonomikasynyń qalyptasýy men damýy, halyqtyń ál-aýqatynyń artýy onyń esimimen bailanysty. Biz uly adamnan aiyryldyq, – dedi Qazaqstan Prezidenti.
Sondai-aq, Nursultan Nazarbaev baýyrlas elderimiz arasyndaǵy tarihi jáne strategiialyq bailanysty nyǵaitý jolynda Ózbekstannyń tuńǵysh Prezidenti baǵa jetpes ról atqarǵanyna toqtaldy.
– Qazaq pen ózbek halqy árdaiym bir-birimen etene jaqyn boldy. Islam Abdýganievich ekeýmiz 1998 jyly Qoja Ahmet Iasaýi kesenesi basynda máńgilik dostyq týraly kelisimge qol qoidyq, bizdiń qarym-qatynasymyz únemi sol kelisimge negizdeldi. Qazaqstan árqashan ózbek halqymen qanattasyp, qatar keledi jáne solai bola beredi. Biz sizdermen barlyq qýanyshty birge bólisip, qiyn kezderde birge qaiǵyramyz, – dedi Memleket basshysy.
Sondai-aq, Nursultan Nazarbaev I.Karimovtiń otbasymen kezdesip, Qazaqstan halqynyń jáne jeke óziniń atynan shyn nietimen kóńil aitty.
Ult portaly
