Qazaqstan Respýblikasynyń Tuńǵysh Prezidenti - Elbasy kitaphanasynda ázerbaijan halqynyń jalpyulttyq kóshbasshysy Geidar Áliev týraly «Eline jol ashqan» kitabynyń tusaýkeseri ótti, dep habarlaidy QazAqparat tilshisi.
Ázerbaijan kóshbasshysy týraly onymen jeke tanys bolǵan prezidentterdiń, álemge belgili saiasatkerlerdiń, ekonomister men biznesmenderdiń estelikter jiyntyǵy osydan bes jyl buryn Máskeýde jaryq kórgen bolatyn. Biyl Geidar Álievtiń 95 jyldyǵy qarsańynda kitap qazaq tiline aýdarylyp, Geidar Álievpen dostyq qarym-qatynasta bolǵan Qazaqstan Prezidenti Nursultan Nazarbaevtyń alǵy sózimen jaryq kórdi.
«Táýelsiz Ázerbaijannyń negizin qalap, taǵdyrsheshti kúrdeli kezeńde eline qaltqysyz qyzmet etken, artyna ónegeli iz qaldyrǵan asa kórnekti memleket qairatkeri Geidar Álievtiń tulǵasy baýyrlas halyqtar tarihynda da airyqsha oryn alady. Meniń Geidar Álirzaulymen tanystyǵym Keńes Odaǵy kezinde bastaldy. Senimdi dostyqqa, jarasymdy syilastyqqa ulasqan qarym-qatynasymyz Táýelsizdik dáýirinde nyǵaia tústi. Biz elderimiz arasyndaǵy bailanystardy damytý, halyqaralyq arenada ózara qoldaý syndy kóptegen máseleler jóninde pikirlesip otyrdyq», - delingen Elbasynyń alǵy sózinde.
Geidar Áliev týraly estelik avtorlarynyń arasynda Ulybritaniia patshaiymy II Elizaveta, AQSh burynǵy Prezidentteri Bill Klinton men Djordj Ý. Býsh, RF Prezidenti Vladimir Pýtin, Izrail Prezidenti bolǵan Shimon Peres, Grýziia Prezidenti bolǵan Edýard Shevardnadze, Ýkraina Prezidenti bolǵan Leonid Kýchma bar. Aýdarma jumystaryn Halyqaralyq Túrki akademiiasy men QR Tuńǵysh Prezidenti - Elbasy kitaphanasy uiymdastyrdy.
Sonymen qatar, kitapta alǵash ret KOKP OK Saiasi biýrosynyń qupiia saqtalyp kelgen Geidar Álievke qatysty qujattar usynylyp otyr. Jinaqqa engen birqatar sýretter de buryn-sońdy esh jerde jariialanbaǵan.
«Ázerbaijan halqy úshin táýelsizdik ońailyqpen kelgen joq. Onda táýelsizdiktiń alǵashqy jyldarynda úlken saiasi daǵdarys boldy. Taýly Qarabaqtaǵy soǵys, túrli zańsyz áskeri qurylymdar eldiń damýyna kedergi keltirdi. Osyǵan bailanysty, ázerbaijan halqy 1993 jyly Geidar Álievti el basshylyǵyna shaqyrǵan bolatyn. Geidar Álievtiń alǵa qoiǵan eń basty mindeti - Ázerbaijannyń táýelsizdigin tuǵyrly etý bolatyn. Buǵan qol jetkizdi, óz eline damýdyń dańǵyl jolyn salyp berdi. Nursultan Nazarbaev pen Geidar Álievtiń dostyǵy eki eldiń ekonomikalyq, áleýmettik, saiasi bailanysyn ǵana nyǵaitqan joq, eki el arasyndaǵy dostyq, yntymaqtastyqty da kúsheitti. Elbasynyń búgingi kitapqa jazyp bergen alǵy sózi de aǵa-dosqa degen inilik iltipaty», - dedi Qazaqstan Respýblikasy Prezidenti Keńsesiniń bastyǵy, jańa basylym redaktsiia alqasynyń jetekshisi Mahmut Qasymbekov kitaptyń tanystyrylymynda.
Geidar Áliev (1923 - 2003) - Ázerbaijannyń tuńǵysh Prezidenti, memleket qairatkeri. 1993 jyly 3 qarashada G. Áliev Ázerbaijan Respýblikasynyń Prezidenti bolyp sailandy. Ol Taýly Qarabaq oqiǵasynda ázerbaijan-armian qaqtyǵystarynyń báseńsip, bir qalypqa túsýine kóp eńbek sińirdi. Syrtqy jáne ishki saiasatta beibitshilik, bitimgershilikti saqtaýǵa, ekonomikalyq bailanystar salasynda ózara tiimdi ýaǵdalastyqtarǵa qol jetkizýge basa kóńil bólgen.
