QR prezidenti Nursultan Nazarbaev elordada bastalǵan AEF forýmynda álemdegi geosaiasi jaǵdaiǵa, bailar men kedeiler arasyndaǵy tabys aiyrmashylyǵyna toqtaldy, dep habarlaidy Sputnik Qazaqstan tilshisi.
"Geosaiasi shielenis, ózara sanktsiialar, DSU erejelerine qaramastan, iri oiynshylar arasyndaǵy saýda qarym-qatynastarynyń qaita qaralýy – munyń barlyǵy memleketterdiń óz kóshbasshylyǵyn saqtap qalýǵa talpynysy. Aýtsaider-elderdiń problemalary damyǵan elderdiń tynyshtyǵyna qaýip-qater tóndiredi. Muny esten shyǵarmaǵan durys dep sanaimyn. Bul migratsiia, ekstremizm, terrorizm, ekologiialyq apattar arqyly bolady", — dedi Elbasy.
Prezident osy oraida úimettiń basty jumysynyń biri – bailar men kedeiler arasyndaǵy tabys aiyrmashylyǵyn azaitý ekenin atap ótti.
"Sońǵy jyldardaǵy makroekonomika dinamikasyna kóz salsaq, onda syrttai pozitivti kartinany baiqaýǵa bolady. HVQ baǵalaýy boiynsha, ishki jalpy ónim ósiminiń qarqyny ótken jylǵy 3,7%-ten biyl 3,9%-ǵa deiin ósti. Ósimniń jyldamdaýy shamamen 120 elde baiqalady. Alaida alty memlekettiń bireýinde ǵana halyq tabysynyń teńsizdigi tómendep jatyr. Sondyqtan bul oraida biraz suraqtar týyndaidy. Búginde álemniń 62 bai adamynyń aktivteri adamzattyń kedei bóliginiń dáýletimen, iaǵni 3,5 mlrd adamnyń aýqatymen teńesken. Al birqatar halyqaralyq sarapshynyń dereginshe, byltyr jinalǵan dáýlettiń 80 protsentten astamy halyqtyń 1 protsentine ǵana tiesili", — dedi Nazarbaev.
Memleket basshysy tehnologiialyq revoliýtsiia halyqtyń turmysyn jaqsartyp, ómir sapasyn arttyrýdyń ornyna, kerisinshe, teńsizdikti kúsheitip otyrǵanyn aitty.
"Osy syn-qaterlerdi eńserý úshin memleketter arasynda bilim almasýdyń jańa tiimdi tetikterin qurý qajettiligi týdy. Ózim talai ret qatysqan G7, G20 bizdiń oiymyzsha, álemniń jahandyq pikirin qamtymaidy", — dedi Elbasy.
