Memleket basshysy Finliandiia Respýblikasyna resmi saparynyń qorytyndysy boiynsha buqaralyq aqparat quraldarynyń ókilderi úshin brifing ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti jýrnalister aldynda sóilegen sózinde qonaqjailyq kórsetkeni úshin Finliandiia Prezidentine rizashylyq bildirip, eki jaqty yntymaqtastyqtyń 26 jyly ishinde memleketter arasyndaǵy qarym-qatynastar seriktestiktiń joǵary deńgeiine jetkenin atap ótti.
– Búgin biz eki jaqty jáne kóp jaqty formattaǵy yntymaqtastyqtyń ahýaly men keleshegin egjei-tegjeili ári ózara senim jaǵdaiynda talqyladyq. Qazaqstan men Finliandiia óńirlik jáne halyqaralyq saiasattyń meilinshe ózekti máselelerin sheshýge qatysty ortaq qaǵidattar men ádisterdi ustanady, – dedi Nursultan Nazarbaev.
Memleket basshysy Finliandiianyń aldaǵy ýaqytta Eýropa Odaǵyna tóraǵalyq etetinine bailanysty, fin tarapynyń Qazaqstan men Eýropa Odaǵy arasyndaǵy keńeitilgen seriktestik pen yntymaqtastyq týraly kelisim aiasyndaǵy dialogty tereńdetýge belsendi yqpal etetinine senim bildirdi.
Nursultan Nazarbaev Qazaqstan – Finliandiia yntymaqtastyǵynyń tabystylyǵy men zor áleýetin atap ótip, ony júzege asyrý úshin barlyq jaǵdai jasalǵanyn aitty.
– Elderimiz arasynda joǵary deńgeidegi saiasi dialog turaqty túrde ótkizilip keledi. Qolaily iskerlik ahýal qalyptasýda. Ózara is-qimyldyń sharttyq-quqyqtyq jáne institýtsionaldyq bazasy nyǵaiýda. Sondai-aq, tikelei áýe qatynasy ornaǵan. Osy múmkindikterdiń bárin tolyq paidalaný kerek, – dedi Qazaqstan Prezidenti.
Memleket basshysy júrgizilgen kelissózderdiń nátijelerine arnaiy toqtalyp, finliandiialyq seriktesterimiz eki jaqty ekonomikalyq bailanystardy damytýǵa múddelilik tanytyp otyrǵanyn atap ótti.
– Biz Qazaqstan men Finliandiia arasyndaǵy Saýda-ekonomikalyq yntymaqtastyq jónindegi úkimetaralyq komissiianyń tiimdiligin arttyrýǵa, sondai-aq energetika, kólik, aýyl sharýashylyǵy jáne bilim berý salalarynda qurylǵan jumys toptarynyń qyzmetin jandandyrýǵa ýaǵdalastyq. Sonymen qatar, biz fin kapitaly men tehnologiiasyn Qazaqstan ekonomikasyn jańǵyrtý jónindegi jobalarǵa tartýdyń jańa múmkindikterin talqyladyq, – dedi Nursultan Nazarbaev.
Memleket basshysy Qazaqstan óńirlerine Finliandiianyń «jasyl» ekonomikadaǵy úzdik tájiribelerin engizý jónindegi josparlaryna toqtalyp, taraptar qaita óńdeý salasyn, innovatsiialyq jáne ǵylymdy qamtityn kásiporyndardy, sondai-aq eksportqa arnalǵan óndiristi yntymaqtastyqtyń basym baǵyty retinde belgileitinin atap ótti.
Nursultan Nazarbaev Qazaqstannyń geografiialyq jaǵdaiynyń artyqshylyqtary jóninde aityp, Sýomidiń eksporttyq áleýetin kúsheitý jáne fin ekonomikasynyń básekege qabilettigin arttyrý jolyndaǵy jańa múmkindikterge nazar aýdardy.
– Qazaqstan men Finliandiianyń logistikalyq kompaniialarynyń qatysýymen eki temir jol baǵytynyń iske qosylýy elderimiz arasynda kólik-tranzit aliansyn qurýǵa jol ashady, – dedi Memleket basshysy.
Sonymen qatar, Qazaqstan Prezidenti brifingke qatysyp otyrǵan jýrnalisterge Finliandiianyń biznes ókilderimen ótken kezdesý jóninde aityp, eki el arasyndaǵy yntymaqtastyqqa serpin beretin jańa biznes jobalarǵa toqtaldy.
Sońynda Nursultan Nazarbaev kelissózder qorytyndysyna joǵary baǵa berip, bul sapar halyqtarymyzdyń igiligi úshin seriktestigimizdi odan ári nyǵaityp, keńeite túsetinine senim bildirdi.
***
Sapar qorytyndysy boiynsha mynadai qujattarǵa qol qoiyldy:
1. Qazaqstan Respýblikasynyń Energetika ministrligi men Finliandiia Respýblikasynyń Ekonomikalyq máseleler jáne jumyspen qamtý ministrligi jáne Finliandiia Respýblikasynyń Qorshaǵan ortany qorǵaý ministrligi arasyndaǵy Energiia jáne «jasyl» ekonomika salasyndaǵy strategiialyq seriktestik jónindegi ózara túsinistik týraly memorandým;
2. Qazaqstan Respýblikasynyń Investitsiialar jáne damý ministrligi men Finliandiia Respýblikasynyń Kólik jáne kommýnikatsiialar ministrligi arasyndaǵy ózara túsinistik týraly memorandým.
