Elbasy Din isteri jáne azamattyq qoǵam ministri Nurlan Ermekbaevty qabyldady, - dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna Din isteri jáne azamattyq qoǵam ministrliginiń qyzmeti men aldaǵy jumys jospary týraly esep berildi.
Qazaqstan Prezidenti din salasynda qalyptasyp otyrǵan jaǵdaiǵa toqtalyp, ministrliktiń rólin, oǵan júktelgen mindetterdi erekshe atap ótti.
– Buǵan deiin bizde mundai ministrlik bolǵan joq. Dini qoǵamdastyqtarmen, úkimettik emes sektormen jáne jastar uiymdarymen jumysty jolǵa qoiyp, ony ári qarai jalǵastyrý qajet, – dedi Nursultan Nazarbaev.
Elbasy memlekettiń dinge jáne dini uiymdarǵa, dini ekstremizmmen kúres sharalaryna qatysty júrgizip otyrǵan saiasatyna airyqsha nazar aýdardy.
– Elimizde kez-kelgen dini birlestiktiń jumys júrgizýine barlyq jaǵdai jasalǵan, din ustaný bostandyǵyna kepildik berilgen. Bul salada bizge baiyptylyq kerek. Sonymen birge dini ekstremizm máselelerin rettep, zańnamany qaita qarastyrý qajet. Ministrlik aldynda aýqymdy jumystar tur, – dedi Memleket basshysy.
N.Ermekbaev Qazaqstan Prezidentine ózi basshylyq etetin saladaǵy jaǵdaidyń turaqty ekenin týraly habarlap, búginde elimizde qyzmetin júrgizip otyrǵan 18 konfessiianyń 3600-den astam dini birlestigi bar ekenin aitty. Ministrdiń aqparaty boiynsha, birlestikterdiń kóbi islam dinine tiesili.
Sondai-aq, N.Ermekbaev Nursultan Nazarbaevqa ministrliktiń etnosaralyq jáne konfessiiaaralyq tatýlyq pen kelisimdi saqtai otyryp, memleket pen dini birlestikterdiń qazaqstandyq ózara is-qimyl modelin qalyptastyrý baǵytyndaǵy jumysy týraly baiandady.
Kezdesý qorytyndysy boiynsha Elbasy birqatar naqty tapsyrma berdi.
.jpeg)