Nursultan Nazarbaev BUU Bas hatshysynyń Siriia boiynsha arnaýly elshisi Staffan de Mistýramen kezdesti, - dep habarlaidy "Ult aqparat" Aqordaǵa silteme jasap.
Kezdesý barysynda taraptar Siriiadaǵy qaqtyǵysty retteý jónindegi kelissózder máselesin talqylady.
Memleket basshysy Astananyń kelissózder ótkizýge daiyn ekenin aityp, barlyq qatysýshylar úshin jaǵdai jasalǵanyn atap ótti.
– Men Resei, Túrkiia jáne Iran Prezidentteriniń Astanada kelissózder ótkizý jónindegi usynysyn qabyl aldym. Biz kezdesýdiń jemisti ótkenin qalaimyz. Qazaqstan kezdesýge qatysatyn taraptardyń bárimen teń ári senimdi qarym-qatynasta bolǵandyqtan, kelissózder qalypty ótý úshin barlyq jaǵdai jasalady dep oilaimyn, – dedi Qazaqstan Prezidenti.
Nursultan Nazarbaev Siriia máselesi búginde Taiaý Shyǵysty ǵana emes, búkil álemdik qaýymdastyqty alańdatyp otyrǵanyn atap ótti.
– Taraptar da bolyp jatqan oqiǵalarǵa biz siiaqty alańdaýshylyqpen qarap otyr degen úmittemin. Sarapshylardyń aitýynsha, qaqtyǵys bastalǵaly 300 myńnan astam adam qaza bolǵan. Osynyń bári bizdi bul máseleni beibit jolmen ǵana sheshemiz dep úmittenýge jeteleidi, – dedi Memleket basshysy.
Qazaqstan Prezidenti BUU-nyń arnaýly ókiline Astanadaǵy kezdesý Jenevadaǵy beibit kelissózderge daiyndyq barysyna eleýli yqpal etetinin aitty.
Staffan de Mistýra Nursultan Nazarbaevqa Astanada kelissózder ótkizýge múmkindik bergeni úshin BUU Bas hatshysy Antoniý Gýtterishtiń atynan alǵys bildirdi.
– Sizdiń elińiz halyqaralyq arenadaǵy eń kúrdeli ahýaldy retteý isinde zor tájiribesin kórsetip, úlgi bolyp keledi. Qazaqstannyń Birikken Ulttar Uiymy Qaýipsizdik Keńesine turaqty emes músheligi Siriia qaqtyǵysyn sheshýdiń qosymsha múmkindigine ainalyp otyr, – dedi Staffan de Mistýra.
Kezdesý qorytyndysy boiynsha taraptar qarýly qaqtyǵysty odan ári retteý sharalary jóninde pikir almasty.
.jpeg)