Qazaqstanda aliment tóleýden jaltarǵan 1500-den astam azamat izdeýde júr. Olardyń tizimi arnaiy portalǵa jariialandy. Birqatar boryshkerdi quqyq qorǵaý organdary birneshe jyldan beri izdese, endi bireýleri tabysyn ádeii tómen kórsetip, balasyna tólenetin qarajatty azaitýdyń amalyn tapqan, dep habarlaidy ult.kz.
«Informbiýro» baǵdarlamasynyń málimetinshe, aliment tólemei, izdeýge jariialanǵan azamattardyń tizimin Qamqor.gov.kz portalynan kórýge bolady. Onda boryshkerlerdiń aty-jóni, týǵan jyly, sýreti jáne izdeýde júrgen merzimi kórsetilgen. Keibir azamattardy quqyq qorǵaý organdary birneshe jyldan beri taba almai keledi. Máselen, bir boryshkerdiń izdeýde júrgenine 1924 kún bolsa, taǵy bireýiniń iz-túzsiz ketkenine 1172 kún bolǵan.
Alaida alimentten jaltarýdyń jalǵyz joly — boi tasalaý emes. Keibir boryshkerler tabysyn qaǵaz júzinde tómen kórsetip, tólenetin qarajatty azaitýǵa tyrysady. Máselen, jeke kásip ashyp nemese tanysynyń kompaniiasyna jumysqa ornalasyp, resmi jalaqysyn nebári 85 myń teńge dep kórsetedi. Nátijesinde aliment te osy somanyń negizinde esepteledi.
Zańger Saǵi Orazdyń aitýynsha, mundai azamattardyń naqty tabysy resmi kórsetkishten birneshe ese joǵary bolýy múmkin.
«Kóp jaǵdaida aliment tóleýden jaltarǵandar 85 myń teńge jalaqy alatynyn kórsetedi. Biraq basqa firmalarda 500 myńnan 1 million teńgege deiin tabys tabýy múmkin. Eger sot oryndaýshysy men aliment óndirip alýshy azamat onyń naqty tabysyn dáleldei alsa, turmystyq jaǵdaiyna da nazar aýdarýǵa bolady. Mysaly, qymbat kiimi, kóligi nemese úii bolsa, zań aiasynda tiisti ótinish berip, múlkin baǵalatýǵa múmkindik bar», – deidi zańger.
Qazaqstan zańnamasyna sáikes, aliment mólsheri balalardyń sanyna qarai belgilenedi. Ata-ananyń tabysynan bir balaǵa – tórtten biri, eki balaǵa – úshten biri, al úsh jáne odan kóp balaǵa tabysynyń jartysy óndiriledi. Degenmen sot taraptardyń materialdyq jáne otbasylyq jaǵdaiyn eskerip, aliment mólsherin ózgerte alady.
Jumyssyzdyq ta aliment tóleý mindetinen bosatpaidy. Eger boryshkerdiń turaqty jumysy bolmasa nemese tabysyn rastaityn qujattary usynylmasa, aliment boiynsha bereshek Qazaqstandaǵy ortasha ailyq jalaqy negizinde esepteledi. Qaryzdyń naqty somasyn sot oryndaýshysy anyqtaidy.
Aliment boiynsha bereshekti óndirip alý úshin boryshkerdiń múlki de nazarǵa alynady. Eger úsh ai boiy jalaqysy nemese ózge tabysy esebinen aliment óndirip alý múmkin bolmasa, sot oryndaýshysy onyń múlkine qatysty zańda kózdelgen sharalardy qoldana alady. Sonymen qatar tiisti negizder bolǵan jaǵdaida bank shottaryna shekteý qoiylyp, elden shyǵýyna tyiym salynýy múmkin.
Boryshkerlerdiń naqty tabysyn anyqtaý baǵytynda da jańa tetikter engizilip jatyr. 14 qazanda Ádilet ministrliginiń atqarýshylyq is júrgizý júiesine engizilgen ózgerister týraly habarlandy. Endi sot oryndaýshylary aliment boiynsha bereshegi bar azamattardyń mindetti zeinetaqy jarnalary týraly málimetterdi júie arqyly surata alady. Bul boryshkerdiń resmi tabysyn anyqtaýǵa kómektesedi.
Al aliment tóleý mindetin qasaqana oryndamaǵan azamattar zańda kózdelgen negizder boiynsha ákimshilik nemese qylmystyq jaýapkershilikke tartylýy múmkin. Demek, tabysyn jasyrý nemese izin sýytý ata-anany balasyn asyraý mindetinen bosatpaidy.
