Qazaqstan prezidenti Nursultan Nazarbaev Ulttyq bank qyzmetiniń qorytyndylary jóninde keńes ótkizdi, dep habarlady Aqordanyń baspasóz qyzmeti.
Jiyn barysynda Memleket basshysyna Ulttyq banktiń 2017 jylǵy atqarǵan jumystary jóninde esep berilip, elimizdiń qarjy sektorynyń damý perspektivalary baiandaldy.
Elbasy makroekonomikalyq kórsetkishterdiń jaqsarǵanyn jáne infliatsiianyń belgilengen mejeden aspaǵanyn atap ótip, bank júiesine memlekettiń qoldaý kórsetip jatqanyna, sondai-aq retteýshi tarapynan qarjy institýttarynyń qyzmetin qadaǵalaýdy kúsheitý qajettigine nazar aýdardy.
– Memleket 3 trillion teńgeden astam qarajat bólip, bank júiesine buryn-sońdy bolmaǵan qoldaý kórsetti. Bul rette, bankter tarapynan berilgen nesieniń kólemi artpai, 2017 jyldyń sońynda 12,7 trillion teńgeni quraǵan. "Jumys istemeitin" nesieniń úlesi – 10 paiyz. Biyl kórsetkishteri óte nashar bankterdi saýyqtyrý jónindegi Ulttyq bank baǵdarlamasy toqtatylady. Aktsionerleri durys basqara almaǵandyqtan bul bankter qaryzǵa batyp, salymshylar aldynda óz mindettemelerin oryndai almady. Sol sebepti kórsetkishteri nashar boldy. Bul jaǵdaidan qalai shyǵýǵa bolady? Bul bankterdi saqtap qalý úshin aktsionerler ózderiniń jeke qarajatyn quiyp, kezinde olardan shyǵaryp alǵan qarjyny qaitarýǵa tiis, – dedi Memleket basshysy.
Nursultan Nazarbaev Qazaqstan halqyna arnaǵan joldaýynda jáne "Bes áleýmettik bastamasynda" kórsetilgen qarjy sektoryn qaita jańǵyrtý jónindegi sharalarǵa toqtaldy.
– Búginde ekonomikany uzaq merzimdi nesiemen qamtamasyz etý máselesi sheshimin tappai otyr. Qor naryǵyn jandandyrý kerek, sondai-aq bank júiesinde týyndaǵan jaǵdailardy ýaqtyly baǵamdap, tiimdi áreket etý qajet. Búgin Parlamentte talqylanyp jatqan valiýtalyq retteý týraly zańǵa engiziletin ózgeristerdiń qabyldanýyna bailanysty "7-20-25" baǵdarlamasy aiasynda atqarylatyn jumysty biyl bastaý kerek. Men qos palata depýtattarynan bul máseleni osy sessiiasynyń sońyna deiin tezdetip qarastyrýdy suraimyn. Bul árbir azamatymyzǵa arnalǵan meniń "Bes áleýmettik bastamamdy" iske asyrý úshin mańyzdy, – dedi Memleket basshysy.
Daniiar Aqyshev 2017 jyly Ulttyq banktiń qyzmeti naryqtaǵy baǵalardyń turaqtylyǵyn qamtamasyz etýge jáne bank sektorynyń jumysyn bir qalypqa keltirýge baǵyttalǵanyn atap ótti.
– Qarjy naryǵyndaǵy jaǵdai qalypty. Makroekonomikalyq kórsetkishter men qarjy sektorynyń damý indikatorlary turaqty túrde jaqsaryp keledi. 2018 jyly infliatsiia 5-7 paiyz shamasynda bolady dep oilaimyz. Biylǵy aqpan aiynyń sońyndaǵy jaǵdaiǵa sáikes, zańdy tulǵalarǵa teńgemen beriletin nesie stavkasy 12,9 paiyzǵa deiin tómendedi, – dedi Ulttyq bank tóraǵasy.
Budan bólek, Daniiar Aqyshev teńgeniń aiyrbas baǵamyndaǵy ahýal men oǵan yqpal etken ishki jáne syrtqy faktorlarǵa túsinik berdi.
– Ótken aptada jekelegen reseilik kompaniialar men tulǵalarǵa qatysty AQSh-tyń ekonomikalyq sanktsiialaryn keńeitýine bailanysty oqiǵalar boldy. Tiisinshe Reseidiń qor jáne valiýta naryǵynda belgili bir ózgerister oryn aldy. Árine, olar Qazaqstannyń da valiýta naryǵyna áser etti jáne bul erkin baǵam jaǵdaiynda qalypty nárse sanalady. Biraq buǵan degen naryqtyń áseri týra proportsionaldy bolǵan joq. Eger rýbl baǵamy 10 paiyzdan astam quldyrasa, teńge nominaldy túrde aitsaq, 3 paiyzǵa ǵana tómendedi, – dedi Ulttyq bank tóraǵasy.
Jiyn sońynda Memleket basshysy Ulttyq bank jumysynyń jaqsara túskenin atap ótip, birqatar naqty tapsyrma berdi.
