Elbasy Bilim jáne ǵylym ministri Erlan Saǵadievti qabyldady, - dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna Bilim jáne ǵylym ministrliginiń 2016 jylǵy jumysynyń qorytyndylary jóninde esep berildi.
Nursultan Nazarbaev bilim jáne ǵylym júiesiniń aldaǵy reformalardy, Qazaqstan Prezidentiniń «Qazaqstannyń úshinshi jańǵyrýy: jahandyq básekege qabilettilik» atty joldaýyn iske asyrýdaǵy mańyzdy rólin atap ótti.
– Biz el ishinde de, sheteldik oqý oryndary qabyrǵasynda da kadrlar daiarlaý isi boiynsha aýqymdy jumystar júrgizdik. Úsh tilde bilim berýge, tsifrlyq oqytý ádisine kóship jatyrmyz. Bilim jáne ǵylym ministrligi aldynda bul salany odan ári damytýǵa bailanysty zor mindetter tur. Qajetti adam resýrstarynsyz joldaýda alǵa qoiylǵan mindetterdi oryndaý, sonyń ishinde tehnologiialyq jańǵyrýdy júzege asyrý, «Tsifrlyq Qazaqstan» memlekettik baǵdarlamasyn iske asyrý múmkin emes, – dedi Qazaqstan Prezidenti.
E.Saǵadiev Memleket basshysyna bilim berýdiń jańartylǵan mazmundaǵy formatyn engizýge, bes kúndik oqý aptasyna kóshýge, bazalyq oqýlyqtar ázirleýge qatysty ministrlik júrgizip jatqan reformalar týraly baiandady.
Sońynda Nursultan Nazarbaev bilim berý júiesinde iske asyrylyp jatqan ózgeristerdiń nátijelerin atap ótip, olardy aqparattyq turǵydan qoldaý máselelerine, sondai-aq qoiylǵan mindetterdiń iske asyrylý qajettigine nazar aýdardy.
Kezdesý qorytyndysy boiynsha Elbasy birqatar tapsyrma berdi.
.jpeg)