Memleket basshysy Prezident Ákimshiliginiń basshylyq quramymen kezdesti, dep habarlaidy "Ult aqparat" Aqordaǵa silteme jasap.
Elbasy kezdesý barysynda Ádilbek Jaqsybekovke Prezident Ákimshiliginiń basshysy laýazymynda jáne basqa da memlekettik qyzmetterde atqarǵan jumysy úshin alǵys aityp, onyń Qazaqstan Respýblikasy memlekettiligin qalyptastyrý jáne damytý isine zor úles qosqanyn erekshe atap ótti.
– Uzaq jyldardan beri menimen birge jumys istep kele jatqan Ádilbek Ryskeldiulyn jaqsy bilesizder. Ol elordanyń alǵashqy ákimi boldy, barlyq laýazymdy qyzmetterde jaýapkershilikpen ári adal eńbek etti. Oǵan zor densaýlyq pen tabys tileimin, – dedi Qazaqstan Prezidenti.
Nursultan Nazarbaev jiynǵa qatysýshylarǵa Prezident Ákimshiliginiń jańa Basshysy Áset Isekeshevti tanystyrdy.
– Áset Órentaiuly meniń kómekshim boldy, ministr, Premer-Ministrdiń orynbasary qyzmetterin atqardy. Ol bas qalamyzda jumys istegen sońǵy eki jarym jyl ishinde elordalyqtardyń joǵary baǵasyna ie boldy. Ol belsendi ári kreativti ustanymmen erekshelenedi. Qazir bizge dál osyndai adam kerek. Isekeshev elordaǵa ákim bolǵan ýaqytta biz «EKSPO-2017» kórmesin jáne Astananyń 20 jyldyǵyn abyroimen ótkizdik. Áset Órentaiuly bul mindetti de laiyqty oryndai alatynyna senimdimin, – dedi Memleket basshysy.
Elbasy jiyn sońynda elimizdiń ekonomikalyq ósimin jáne halyqtyń ál-aýqatyn odan ári arttyrý isinde Prezident Ákimshiliginiń basty ról atqaratynyn atap ótip, onyń aldaǵy kezeńge arnalǵan jumystarynyń negizgi basymdyqtaryn belgilep berdi.
– Apparattyń aldynda buǵan deiin qabyldanǵan memlekettik baǵdarlamalardyń júzege asyrylýyn jáne oryndalýyn qamtamasyz etý jónindegi mańyzdy mindet tur. Búginde jumys aýqymy óńirlik deńgeige aýysqanyn erekshe atap ótkim keledi jáne barlyq deńgeidegi ákimderdiń qyzmetin tiimdi úilestirý, olardyń ózara yqpaldasa eńbek etýine kómektesý qajet, – dedi Nursultan Nazarbaev.
