Búgin Memleket basshysy Nursultan Ábishuly batys óńirine jumys saparymen barǵan bolatyn. Áýelgi jumysty aimaqtaǵy irgeli kásiporyndardyń jumysymen tanysýdan bastaǵan Elbasy sapar sońyn Batys Qazaqstan oblysynyń áleýmettik-ekonomikalyq damý máseleleri jónindegi keńesimen túiindedi.
Oral shaharyna at basyn burǵan El Prezidenti óńirdegi birqatar infraqurylymdyq jáne áleýmettik-mádeni nysandarmen tanysyp, ónerkásiptik kásiporyndardy da aralap qaitqan-dy. Endigi keńes áleýmettik-ekonomikalyq máseler tóńireginde boldy.
Jiyn barysynda BQO oblysy ákimi Altai Kólginovtiń óńirdiń damý barysy jónindegi esebi oqyldy. Óńir basshysy 2017 jyldyń jáne biylǵy birinshi toqsannyń qorytyndysy boiynsha baiandama jasady.
Sondai-aq, oblys ákimi Elbasynyń memlekettik jáne salalyq baǵdarlamalarǵa qatysty bergen tapsyrmalarynyń oryndalýy jóninde aityp ótti.
Aqordanyń baspasóz qyzmeti habarlaǵandai, basqosýda Nursultan Ábishuly óńirde daiyn ónim shyǵarý isiniń jolǵa qoiylǵanyn aityp, memlekettik áleýmettik baǵdarlamalardyń iske asyrylý barysyna oń baǵa berdi.
– Búgin oblystaǵy nysandardy aralap kórgendegi maqsatymyz – memlekettik baǵdarlamalardyń, sonyń ishinde jaqynda qabyldanǵan «Bes áleýmettik bastamanyń» iske asyrylý barysymen tanysý. Olardy júzege asyrý qoǵam ómirine oń áserin tigizedi, – dedi Memleket basshysy.
Elbasy «Qazaqstan-2050» strategiiasynyń maqsattaryna qol jetkizý isinde barlyq óńirdiń atqaryp jatqan jumystarynyń mańyzdy ekenin aitty.
Memleket basshysy Batys Qazaqstan oblysynyń ekonomikalyq damýynyń negizgi kórsetkishteri ósip kele jatqanyna toqtalyp, óńir turǵyndarynyń ál-aýqatyn arttyrýǵa baǵyttylǵan jumystardy jalǵastyrý qajettigin atap ótti.
– Azamattardyń ál-aýqaty turǵyn úi qurylysyna da bailanysty bolady. Sońǵy bes jylda oblysta bir jarym million sharshy metr turǵyn úi paidalanýǵa berilgeni qýantarlyq jáit. «Bes áleýmettik bastamany» iske asyrý arqyly biz qurylys qarqynyn arttyratyn bolamyz, – dedi Nursultan Nazarbaev.
Qazaqstan Prezidenti shaǵyn jáne orta bizneske qoldaý kórsetý, aýyl sharýashylyǵyn damytý men aýyl sharýashylyǵy ónimderin qaita óńdeý máselelerine, sondai-aq ózin-ózi jumyspen qamtyǵandardyń problemasyna toqtaldy.
Elbasy oblys basshylyǵyna ekonomikanyń jańa sektorlarynda zamanaýi óndiris oryndaryn ashý jónindegi jumystardy jandandyrýdy jáne óńirdegi kásiporyndardy odan ári damytýdy tapsyrdy.
– Iri investorlardy tartýǵa baǵyttalǵan jumystardy jalǵastyrýdyń da mańyzy zor. Máselen, meniń AQSh-qa saparymnan keiin amerikalyq iri biznesmender toby Qazaqstanǵa kelip, kelissózder júrgizip jatyr. Biz úshin olardyń investitsiiasy, tehnologiialary jáne naryǵy mańyzdy, – dedi Memleket basshysy.
Nursultan Nazarbaev jańa tehnologiialardy paidalaný arqyly oblysta «jasyl» ekonomikany damytýdyń qajettigin atap ótti.
Memleket basshysy aýyl jastaryn jumyspen qamtý problemasyna toqtalyp, olardy memleket qabyldaǵan baǵdarlamalardy júzege asyrý úderisine tartýdy tapsyrdy.
Qazaqstan Prezidenti shaǵyn jáne orta biznes sektoryndaǵy disproportsiiaǵa nazar aýdardy.
– Oral qalasy men Bórli aýdany shaǵyn jáne orta bizneske tiesili búkil ónimniń 90 paiyzyn óndirip otyr. Qalǵan 11 aýdan 10 paiyzdy qamtidy. Jurtqa biznespen ainalysýdy úiretip, kásipkerlerdi qoldaýǵa arnalǵan qandai memlekettik baǵdarlamalar bar ekenin kórsetý kerek. Biznesti damytý úshin qolaily jaǵdai jasaý qajet, – dedi Nursultan Nazarbaev.
Memleket basshysy, sondai-aq, eksport kólemin arttyrý úshin óńirdiń shekara mańy áleýetin belsendi paidalanýdy tapsyryp, oblysta kólik infraqurylymyn damytýdyń mańyzdy ekenin atap ótti.
Jiyn sońynda Elbasy óńirdiń damý qarqynyn saqtaýdy jáne jumys sapary barysynda berilgen tapsyrmalardyń júzege asyrylýyn baqylaýǵa alyp, qamtamasyz etýdi tapsyrdy.
Bul basqosý óńirdiń áleýmettik-ekonomikalyq damý úderisine jańa qarqyn qosary sózsiz. Aimaq tizginin ustaǵan Altai Kólginovtiń aldaǵy jumys jospary aiqyn. Naqty nátijeler de óz jemisin bere bastady. El Prezidentiniń Oral óńirine jasaǵan arnaiy sapary nátijeli aiaqtaldy.
