Elbasy Ulttyq ekonomika ministri Timýr Súleimenovti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysyna 2017 jyldyń qorytyndylary boiynsha ekonomikalyq damý kórsetkishterine jasalǵan taldaý nátijeleri jóninde málimdelip, ministrliktiń qyzmeti týraly esep berildi.
Nursultan Nazarbaev memlekettik baǵdarlamalardy ázirleý jáne iske asyrý barysynda strategiialyq josparlaý men boljam jasaýdyń mańyzdylyǵyn atap ótti.
– Barlyq sharalar Qazaqstan ekonomikasyn damytý úshin júzege asyrylýǵa tiis. Memlekettik baǵdarlamalardyń, sonyń ishinde «Bes áleýmettik bastamanyń» iske asyrylý barysyn zertteý qajet. Ulttyq ekonomika ministrligi ortalyq jáne óńirlik deńgeidegi barlyq memlekettik organdardyń qadamdaryn aiqyndaýy kerek, – dedi Qazaqstan Prezidenti.
Timýr Súleimenov Memleket basshysyna biylǵy birinshi toqsanda qol jetkizilgen ekonomikalyq damý nátijeleri jáne ekonomikamyzǵa jalpy álemdik úderisterdiń tigizip otyrǵan áseri jóninde baiandady.
Kezdesý sońynda Elbasy birqatar naqty tapsyrma berdi, sonyń ishinde Qazaqstannyń eksporttyq jáne tranzittik áleýetin odan ári damytý, memlekettik jáne salalyq baǵdarlamalardy ári qarai iske asyrý jóninde aitty.
