Áleýmettik jelide Qazaqstannyń Tuńǵysh prezidenti Nursultan Nazarbaevtyń aýrýhanada jatqandai beinelengen sýreti tarap ketti. Alaida bul fotonyń shynaiylyǵyna jeli qoldanýshylary men faktchekerler kúmán keltirdi, dep habarlaidy ult.kz.
Eks-prezidentke qatysty jariialanym Instagram jelisinde birneshe kún buryn paida bolǵan. Sýrette Nazarbaev aýrýhana tóseginde, janynda tamshylatqysh pen meditsinalyq qurylǵylar turǵandai kórsetilgen.
Burynǵy memleket basshysynyń qasynda dárigerge uqsas adam beinelengen. Sýrettiń tómengi bóliginde 2026 jylǵy 23 mamyr degen ýaqyt belgisi de kórsetilgen.
Jazba avtory jariialanymda elge qyzmet etken adamǵa halyqtyń alǵysy men aq tilegi eń joǵary marapat ekenin jazǵan. Sondai-aq densaýlyq adamǵa berilgen eń qymbat nyǵmetterdiń biri ekenin aityp, úlken býyn ókilderine saýlyq pen uzaq ǵumyr tileý halyq dástúriniń mańyzdy bóligi ekenin atap ótken.
Alaida jazba astyndaǵy pikirler ekige jaryldy. Bir top qoldanýshy sýrettiń jalǵan ekenin birden jazsa, endi biri eks-prezidentke qatysty syn pikirler qaldyrǵan. Al keibir jeli qoldanýshylary jazbany emotsiiamen qabyldap, tezirek saýyǵyp ketýin tilegen.
Nazarbaevtyń aýrýhanadaǵy sýreti ras pa?
Mamandardyń aitýynsha, atalǵan sýrettiń jasandy intellekt arqyly jasalǵany baiqalady. Birinshiden, sýrettiń oń jaq tómengi buryshynda Gemini logotipi kórinedi. Ekinshiden, fotoda jasandy intellektke tán belgiler bar: artqy fondaǵy jazýlar anyq oqylmaidy, keibir bólshekter burmalanǵan.
Keiin bul sýrettiń shynaiy emes ekenin Factcheck.kz portalynyń jýrnalisteri de rastady.
