Elbasy Aqmola oblysynyń aktivimen óńirdiń áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat" Aqordaǵa silteme jasap.
Memleket basshysy kezdesýge qatysýshylarǵa jergilikti máslihattyń kezekten tys sessiiasynda kandidatýrasy maquldanǵan oblystyń jańa ákimi Málik Myrzalindi tanystyrdy.
Qazaqstan Prezidenti oblys aktivine arnaǵan sózinde birqatar kórsetkishter boiynsha, atap aitqanda ónerkásip, aýyl sharýashylyǵy ónimderin óndirý, investitsiialar tartý kólemi, sondai-aq turǵyn úi qurylysy jóninen óńir ekonomikasy dami túskenin aitty.
– Aýqymdy úsh daǵdarysty bastan ótkersek te, elimizdegi turaqtylyqty saqtap qaldyq jáne ári qarai damyp kelemiz. Ekonomikalyq qiyndyqtardy eńserýge múmkindik beretin ulttyq qor jinaqtai aldyq. Endi aldymyzda álemniń damyǵan 30 eliniń qataryna qosylý maqsatyna qol jetkizý úshin «Qazaqstannyń úshinshi jańǵyrýy: jahandyq básekege qabilettilik» atty joldaýdy iske asyrý aiasyndaǵy jańa mindetter tur, – dedi Nursultan Nazarbaev.
Elbasy álemniń jańa naqty ahýaly jaǵdaiynda tehnologiialar qarqyndy damyp kele jatqanyn atap ótip, joldaýda kórsetilgen mindetterdi iske asyrý úshin jańa bilim men tásilderdi qoldaný qajettigine nazar aýdardy.
Memleket basshysy indýstriialandyrý baǵdarlamalaryn júzege asyrýdyń, óńir jáne búkil respýblika boiynsha infraqurylymdy damytýdyń mańyzdylyǵyna toqtaldy.
– Taiaý jyldary Qazaqstanda 7 myń shaqyrym avtomobil joldary salynatyn bolady. Óńirlerdiń barlyǵy joǵary sapaly magistraldar arqyly bailanysady. Olar balalarymyz ben nemerelerimiz úshin máńgilikke qalatyn bolady. Sondai-aq, áýejailar qalpyna keltirilýde. Kaspiide 2 teńiz porty salynýda. Elimizde júzege asyrylyp jatqan barlyq baǵdarlamalar jańasha tásilderdi qoldanýdy qajet etedi, – dedi Qazaqstan Prezidenti.
Sondai-aq, Nursultan Nazarbaev M.Myrzalinge oblystyń aýyl sharýashylyǵy sektoryn odan ári damytýǵa qatysty birqatar mindet júktedi. Atap aitqanda, Memleket basshysy aýyl sharýashylyǵy kooperativin qurý, ǵylymi áleýetti paidalaný arqyly ónimdilikti arttyryp, aýyl sharýashylyǵyna shaǵyn nesie bólý, shaǵyn jáne orta biznesti jandandyrý arqyly agroónerkásip keshenin damytýdyń mańyzdylyǵyn aitty.
Elbasy aldaǵy «EKSPO-2017» halyqaralyq kórmesi aiasynda paidalanylatyn oblystyń týristik áleýetin erekshe atap ótti.
Sońynda Qazaqstan Prezidenti qatysýshylarǵa biylǵy astyqtyń mol olýyn tilep, kóktemgi egis jumystarynda tabysqa jetýlerine niettestik bildirdi.
.jpeg)