Qazaqstan prezidenti Nursultan Nazarbaev Astananyń 20 jyldyǵyn túrli sharalarǵa kóp shyǵyndanbai, óz deńgeiinde atap ótýdi tapsyrdy. Bul týraly memleket basshysy Astanada ótip jatqan Qazaqstan halqy Assambleiasynyń XXVI sessiiasynda aitty, dep habarlaidy Sputnik Qazaqstan tilshisi.
"Biylǵy jyly biz Astananyń jiyrma jyldyǵyn atap ótemiz. Astana – bul birlik pen kelisimniń jalpyulttyq úlgisi. Shaǵyn ǵana Aqmola qalasy búginde halqy bir millionnan asatyn Astana qalasyna ainaldy. Taiaýda biz qalanyń ári qarai damýyn qarastyryp, 2020 jylǵa qarai elordanyń eki milliondyq qala bolatynyn anyqtadyq. Biz elimizde osyndai birneshe megapolis bolǵanyn qalaimyz. Eger Astana halqy eki millionǵa jetse, Almatyda shamamen úsh million, Shymkentte bir million bolady", — dedi Nazarbaev.
Prezidenttiń aitýynsha, osyndai iri qalalarda ǵylym, mádeniet, tehnologiialar qarqyndy damidy, al bul elimiz úshin óte mańyzdy.
"Ýrbanizatsiia júrip jatyr, adamdar qalada turǵysy keledi. Astanaǵa elimizdiń túkpir-túkpirinen turǵyndar kelip jatyr. Osy jerde jumys, baspana, baqytyn tapty", — degen memleket basshysy elordanyń mereitoiyn óz deńgeiinde, artyq shyǵynsyz toilaýdy tapsyrdy.
"Astana ákimdigi mádeniet ministrligimen birlesip, bul kúndi jaltaqtamai, túrli sharalarǵa artyq shyǵyndanbai, baisaldy atap ótýdiń baǵdarlamasyn ázirleý kerek", — dep túidi sózin Nazarbaev.
.jpeg)