Qazaqstan Prezidenti Nursultan Nazarbaev Angela Merkelge Germaniia Federativtik Respýblikasynyń Kantsleri laýazymyna qaita sailanýyna bailanysty quttyqtaý jedelhatyn joldady, dep habarlaidy "Ult aqparat" Aqordaǵa silteme jasap.
Memleket basshysy Germaniia Federativtik Respýblikasynyń Kantsleri laýazymyna qaita sailanǵan Angela Merkeldi quttyqtady.
«Ótken parlamenttik sailaýdaǵy jeńisińiz - Germaniia azamattarynyń Sizge, sondai-aq Germaniia Federativtik Respýblikasynyń Eýropadaǵy jáne álemdegi ornyn nyǵaitýǵa, elińizdiń áleýmettik-ekonomikalyq ahýalyn jaqsartýǵa baǵyttalǵan saiasatyńyzǵa degen seniminiń dáleli.
Sizdiń basshylyǵyńyzben Germaniianyń jańa Federaldyq úkimeti Qazaqstan men Germaniia arasyndaǵy ózara tiimdi yntymaqtastyqty odan ári damyta túsedi dep senemin.
Sizge osy jaýapty qyzmette tabys tileimin, sondai-aq barsha Germaniia halqynyń ósip-órkendeýine niettestik bildiremin», - delingen jedelhatta.
