Nursultan Nazarbaev «ALSTOM» kompaniiasy basqarmasynyń tóraǵasy Anri Pýpar-Lafarjdy qabyldady, dep habarlaidy "Ult aqparat" Elbasynyń Baspasóz qyzmetine silteme jasap.
Kezdesý barysynda taraptar investitsiialyq yntymaqtastyqtyń qazirgi ahýaly men perspektivalaryn talqylady.
– Biz 7 jyl buryn tabysty yntymaqtastyǵymyzdy bastadyq. Búginde sizderdiń kásiporyndaryńyz temirjol salasynda ǵana emes, sondai-aq mashina jasaý salasynda da jumys istep keledi. Kompaniiańyz shyǵaratyn ónim óńir elderinde suranysqa ie, – dedi Qazaqstannyń Tuńǵysh Prezidenti.
Áńgimelesý kezinde Nursultan Nazarbaev elimizdiń kólik-tranzit áleýetiniń artýyna orai infraqurylymdy damytýdyń mańyzdy ekenin atap ótti.
– Qazir infraqurylymdyq damý óńirdegi mańyzdy baǵyttardyń biri sanalady. Bul Qytaidyń «Bir beldeý, bir jol» bastamasyna da bailanysty. Biz temirjol jelilerin saldyq, – dedi Elbasy.
Anri Pýpar-Lafarj Nursultan Nazarbaevtyń investitsiialyq yntymaqtastyqty nyǵaitý isindegi rólin atap ótip, kezdesýge múmkindik bergeni úshin Qazaqstannyń Tuńǵysh Prezidentine rizashylyq bildirdi.
– Elektrovoz qurastyrý zaýytynda kóp tehnika shyǵaryldy. Bul ónim shetel naryǵyna da jetkizilýde. Ázerbaijanǵa eksporttaýdy bastadyq. Biz qazaqstandyq mamandardyń arqasynda sapaly ónim shyǵarýǵa múmkindik aldyq. Qazir óndirisimizdi keńeitýdi josparlap otyrmyz. Zaýyt qyzmetkerlerin 500-den 700 qyzmetkerge deiin, sondai-aq kásiporynnyń ónimdiligin jylyna 100 elektrovozǵa deiin kóbeitý josparda bar, – dedi «ALSTOM» kompaniiasy basqarmasynyń tóraǵasy.
