Nursultan Nazarbaev áielder qaýymy ókilderimen «Kóktem shýaǵy» atty kezdesý ótkizdi, dep habarlaidy "Ult aqparat" Aqordaǵa silteme jasap.
Kezdesýdi ashqan Memleket basshysy jiynǵa qatysýshylardy jáne elimizdiń búkil áielder qaýymyn kele jatqan 8 naýryz – Halyqaralyq áielder kúnimen quttyqtady.
Qazaqstan Prezidenti kóp balaly analarǵa qoldaý kórsetýge arnalǵan jańa aýqymdy áleýmettik sharalardy júzege asyrýdyń mańyzdylyǵyn aityp, bul kómektiń kólemi birtindep arta beretinin atap ótti.
– Negizinen, bul qoldaý sharalary tabysy tómen kóp balaly otbasylar úshin áleýmettik kómekti kúsheitýge baǵyttalatyn bolady. Áleýmettik tólemder men járdemaqylar kólemi artyp, biýdjet salasyndaǵy jalaqysy tómen qyzmetkerlerdiń eńbekaqysy ósedi, turǵyn úiler salynady. Sondai-aq, «Baqytty otbasy», «Qutty meken» jáne «Aýyl – el besigi» jobalary júieli qoldaý kórsetýge baǵyttalǵan, – dedi Elbasy.
Nursultan Nazarbaev keleshek urpaqty tárbieleý isinde áielderdiń airyqsha ról atqaratynyn aitty.
– Álemdegi eń mańyzdy nárse áieldiń qolynan keledi. Ol adamǵa ómir syilaidy. Orta eseppen, bir otbasynda úsh bala tárbielenip otyr desek, bir jylda shamamen 400 myń sábi ómirge keledi. Bala – bir otbasynyń bailyǵy men maqtanyshy ǵana emes, tutas eldiń baǵa jetpes kapitaly. Sondyqtan bizdiń analarymyz, ásirese kóp balaly analar, erekshe qurmet pen alǵysqa laiyq. Olar halqymyzdyń igiligin eselep, naǵyz erlik kórsetip otyr, – dedi Memleket basshysy.
Elbasy qazaqstandyqtardyń ál-aýqaty men otbasylyq ómirdiń qundylyqtary memlekettiń berik negizi sanalatynyn atap ótti.
– Qarqyny kúshti ári jańashyldyqqa toly zamanda sizder el igiligi úshin óz áleýetterińiz ben qabiletterińizdi tabysty júzege asyryp kelesizder. Túrli salalar men baǵyttarda jańa belesterdi baǵyndyryp, mańyzdy nátijelerge qol jetkizip otyrsyzdar. Meniń jańǵyrý jónindegi ideialarymdy iske asyrýdyń bastaýynda áielder qaýymy tur, – dedi Qazaqstan Prezidenti.
Nursultan Nazarbaev áielderdiń el ómirine belsendi atsalysyp otyrǵanyn atap ótti.
– Búginde bilim berý jáne densaýlyq saqtaý salasyndaǵy áielderdiń úlesi 70 paiyzǵa jetse, qarjy jáne saqtandyrý mekemelerinde 60 paiyzdy quraidy, al aýyl sharýashylyǵynda – 45 paiyz. Bizneste, shyǵarmashylyq salasy men sport áleminde zor tabysqa qol jetkizgen áielder az emes. Bizge, iaǵni erkekter qaýymyna, sizderden qalyp qoimaý úshin oilanatyn kez keldi, – dedi Memleket basshysy.
Sońynda Qazaqstan Prezidenti elimizdiń áielder qaýymy ómirimizdiń ainasy ekenin ári halqymyzdyń minez-qulqyn aishyqtaitynyn aitty.
– Bizdiń mindetimiz – sizder úshin jasampaz bastamalaryńyzdyń tolyq júzege asýyna jaǵdai jasaý, – dedi Elbasy.
Kezdesýge Premer-Ministrdiń orynbasary, Qazaqstan Respýblikasynyń Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraiymy G.Ábdiqalyqova, «Astana-Zelenstroi» AQ brigada jetekshisi N.Ermolina, Almaty oblysy Alakól aýdany Analar keńesiniń tóraiymy U.Dúisebaeva, kranshy A.Asmaǵambetova, Qostanai oblysy Michýrin aýyldyq okrýginiń ákimi V.Klochko, «Qazaq-Oner» qolónershiler ortalyǵynyń basshysy A.Janserikova, aqyn, «Jetisý» gazetiniń tilshisi M.Tájmaǵanbetova, «Kishkentai» áleýmettik atele» jobasynyń jetekshisi A.Mustafina, onkolog-dáriger V.Iýn, ustaz N.Sadyqova, «Nazarbaev Ýniversiteti» DBBU Ǵylym jáne tehnologiialar mektebiniń assistent-professory A.Sandyǵulova, kóshi-qon qyzmetiniń inspektory A.Ábisheva, «Nur» sharýa qojalyǵynyń basshysy S.Maýteeva, «DANA» jeke bilim berý mektebiniń bas direktory K.Batyrbekova, aktrisa S.Esliamova, «Life4job» JShS direktory A.Baqtyǵalieva, Memlekettik kúzet qyzmeti Prezidenttik orkestriniń jetekshi solisi K.Tólenbaeva qatysty.
