Qazaqstannyń Tuńǵysh Prezidenti Nursultan Nazarbaevtyń tóraǵalyǵymen Qazaqstan halqy Assambleiasynyń XXVII sessiiasy ótti, dep habarlaidy "Ult aqparat" Aqordaǵa silteme jasap.
QHA Tóraǵasy jiynǵa qatysýshylardy sessiia jumysynyń bastalýymen quttyqtap, elimizde beibitshilik pen turaqtylyqty saqtaý isindegi Qazaqstan halqy Assambleiasynyń mańyzdy rólin atap ótti.
– Jahandyq álem kúshti transformatsiiany bastan ótkerip otyr. Biz bárimiz múlde jańa tarihi dáýirde ómir súrip jatqanymyzdy túsinemiz. Ekonomika, qoǵam ómiri jáne tehnologiia túbegeili ózgerdi. Bul jańalyqtardy qabyldap, kóp nárseni úirenemiz, biraz nárseni istei alamyz. Biraq, bul qubylmaly álemde bir ǵana máńgi ári keshendi qundylyq bar. Ol – qoǵamnyń birligi men ultaralyq kelisim, – dedi Elbasy.
Nursultan Nazarbaev táýelsizdik jyldary Qazaqstan halqynyń elimizde etnosaralyq qarym-qatynastardyń keleshegine qatysty destrýktivti boljamdardyń bárin joqqa shyǵarǵanyna nazar aýdardy.
– Biz ekonomikasy qarqyndy damyp kele jatqan myqty memleket qurdyq. Tarih synaqtarynyń bárin birge eńserdik. Pragmatikalyq jáne sarabdal syrtqy saiasatymyzdyń arqasynda halyqaralyq bedelimizdi biiktettik. Elimizdegi etnosaralyq qarym-qatynastardyń úlgisi teńdestirilgen, ýaqyt jaǵynan tiimdi ári tájiribeden ótkizilgen. Bul bárine úlgi bolýǵa tiis, – dedi Elbasy.
Sessiia barysynda Elbasy Qazaqstan qoǵamyndaǵy turaqtylyqty saqtaý úshin barlyq tetikterdiń qalypty ári tiimdi jumysyn qamtamasyz etýdi tapsyrdy.
Qazaqstannyń Tuńǵysh Prezidenti memlekettik organdar janyndaǵy mediatsiia institýty men qoǵamdyq keńesterdiń jumysyn jandandyrý qajettigin aitty. Sonymen qatar, Elbasy Assambleia kásipkerleriniń qaýymdastyǵyna arqyly sheteldik investorlarmen ekonomikalyq yntymaqtastyqty nyǵaitýǵa jáne Qazaqstan halqy Assambleiasynyń depýtattyq korpýsynyń áleýetin belsendi paidalanýǵa shaqyrdy.
Nursultan Nazarbaev sóilegen sózinde barsha musylman qaýymyn aldaǵy qasietti Ramazan aiynyń bastalýymen jáne hristian ókilderin Pasha merekesimen quttyqtady.
– Halqymyzǵa, sonyń ishinde Qazaqstan halqy Assambleiasynyń barlyq múshesine qoldaý kórsetip, túsinistik tanytqany úshin rizashylyǵymdy bildirgim keledi. Prezident sailaýy 9 maýsymǵa taǵaiyndaldy. «Nur Otan» partiiasynyń kezekten tys HIH sezinde Qasym-Jomart Kemeluly Toqaevtyń kandidatýrasy usynyldy. Ol – tájiribeli memleket qairatkeri, elge basshylyq etýge laiyq Qazaqstannyń naǵyz patrioty. Barsha qazaqstandyqtardy, Assambleianyń múshelerin aldaǵy sailaýǵa belsendi atsalysyp, taǵy bir ret birligimizdi tanytýǵa shaqyramyn. Barsha qazaqstandyqtarǵa aspandarynyń ashyq bolýyn, ár otbasyna beibit ómir, amandyq jáne baq-bereke tileimin, – dedi Tuńǵysh Prezident.
Sessiia barysynda QHA Tóraǵasynyń jańa orynbasarlary bolyp Iýsýp Keligov jáne Sherzod Pýlatov taǵaiyndaldy.
Elbasynyń sóilegen sóziniń tolyq mátinin myna jerden oqi alasyzdar.
