Qazaqstan Prezidenti AQSh-tyń Saýda ministri Ýilbýr Rosspen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda taraptar eki eldiń saýda-ekonomika jáne investitsiia salalaryndaǵy qarym-qatynastarynyń qazirgi jaǵdaiy men damý perspektivalaryn talqylady.
Memleket basshysy Saýda ministriniń bul sapary AQSh-tyń Ortalyq Aziia óńirimen yntymaqtastyqty damytýǵa múddeli ekenin aiqyn ańǵartatynyn, sondai-aq ózara ekonomikalyq bailanystardy nyǵaitýǵa septigin tigizetinin aitty.
Nursultan Nazarbaev biylǵy qańtar aiyndaǵy AQSh-qa resmi sapary barysynda joǵary deńgeide ótken kezdesýlerdiń nátijelerine toqtaldy.
– Kezdesýde Prezident Donald Tramppen ózara túsinistikke qol jetkizdik. Qazaqstan men Amerika arasyndaǵy qarym-qatynastar keńeitilgen seriktestik deńgeiine kóterildi. Bul týraly tiisti málimdemege qol qoiyldy. Men resmi sapar barysynda AQSh-tyń «biznes kapitandarynyń» úlken tobymen kezdestim. Birlesken biznes-forýmda jalpy quny 7 milliard AQSh dollary bolatyn túrli 27 kommertsiialyq qujatqa qol qoiyldy. Búginde elderimiz arasyndaǵy saýda kólemi 2 milliard AQSh dollaryna jetti. Biyl bul kórsetkish 30 paiyzǵa ósti, – dedi Qazaqstan Prezidenti.
Sonymen qatar, Memleket basshysy eki el arasyndaǵy yntymaqtastyqtyń damý tarihyna toqtalyp, Qazaqstan táýelsizdiginiń alǵashqy jyldarynda qol qoiylǵan kelisimder jóninde aitty.
– Qazaqstan iadrolyq qarýdan bas tartyp, álemdegi iri iadrolyq poligondy japqan soń, biz Prezident úlken Djordj Býshpen yntymaqtastyq jóninde birinshi kelisimshartqa qol qoidyq. Sol kezde «Shevron» kompaniiasy bizdiń elde jumys isteýge niet bildirdi. Bul kompaniia jumysynyń tarihy Qazaqstanda biznes júrgizýdiń qanshalyqty tabysty bolatynyn aiqyn kórsetedi, – dedi Qazaqstan Prezidenti.
Memleket basshysy búginde Qazaqstannyń kópvektorly saiasat júrgizip otyrǵanyn jáne seriktes elderdiń bárimen tatý qarym-qatynas ornatqanyn atap ótti.
Ýilbýr Ross Nursultan Nazarbaevqa kezdesýge múmkindik týǵyzǵany úshin rizashylyq bildirip, Astanany kórgen kezdegi áseri jóninde áńgimeledi.
– Men Qazaqstanǵa birinshi ret kelip otyrmyn. Áýejaidan kele jatyp, Astananyń sáýletine tamsana qaradym. Sizderde qurylys jumystary qarqyndy júrgizilýde ári ekonomikalaryńyz da qaryshtap damyp keledi, – dedi AQSh-tyń Saýda ministri.
Sondai-aq, Ý.Ross Astanaǵa ózimen birge Qazaqstanmen saýda-ekonomikalyq qatynastardy damytýǵa niet bildirgen amerikalyq 16 kompaniianyń delegatsiiasy kelgenin atap ótti.
AQSh-tyń Saýda ministri Qazaqstan Prezidentine AQSh Prezidenti D.Tramptyń izgi tilegin jetkizip, eki memleket arasyndaǵy yntymaqtastyqty odan ári nyǵaityp, keńeite túsýge múddeli ekenin aitty.
