Nursultan Nazarbaev Amerika Qurama Shtattarynyń Qazaqstandaǵy Tótenshe jáne ókiletti elshisi Ýiliam Mozerdi qabyldady, dep habarlaidy "Ult aqparat".
Elbasy Ýiliam Mozerdi Qazaqstandaǵy diplomatiialyq missiiasynyń bastalýymen quttyqtap, jaýapty qyzmetiniń tabysty bolýyna niettestik bildirdi.
– Osy jyldar ishinde biz AQSh-pen ózara túsinistikke jáne dostyqqa negizdelgen qatynastar ornattyq. Qazaqstanǵa AQSh-tan qomaqty investitsiia keldi. 420 birlesken kásiporyn jumys istep keledi. Meniń Vashingtonǵa jasaǵan byltyrǵy saparym, sonyń aiasynda Prezident Donald Tramppen jáne biznesmendermen bolǵan kezdesýim yntymaqtastyǵymyzdy odan ári damytýǵa jaǵdai jasady, – dedi Qazaqstannyń Tuńǵysh Prezidenti.
Ýiliam Mozer Qazaqstanǵa alǵash ret kelgendegi áseri týraly aitty. AQSh elshisi elordamyz – Nur-Sultan qalasyn salý jáne tanytý isindegi aitarlyqtai nátijege qysqa ýaqyt ishinde qol jetkizilgenin atap ótti.
Sonymen qatar, AQSh elshisi Ý.Mozer Nursultan Nazarbaevqa Donald Tramptyń hatyn berdi. Onda AQSh Prezidenti Elbasynyń óz ókilettigin toqtatý jáne memleket basqarý isin saiasatkerlerdiń jańa býynyna berý týraly sheshimine qoldaý bildiredi.
– Men Prezident Tramptyń hatyn aldym. Ol bizdiń óńirdegi ahýal týraly aldaǵy ýaqytta da menimen kezdesip, aqyldasyp otyrýǵa nietti ekenin jetkizdi. Donald Tramppen jaqsy qarym-qatynas ornady. Men osyndai bailanysta bolýǵa daiynmyn. Biz úshin AQSh mańyzdy seriktes sanalady. Osy jyldar ishinde aramyzda tek dostyq qatynastar boldy. Yntymaqtastyǵymyz jalǵasa beredi dep senemin, – dedi Nursultan Nazarbaev.
