Memleket basshysy resmi saparmen Birikken Arab Ámirlikterine bardy, dep habarlaidy "Ult aqparat" Aqordanyń baspasóz qyzmetine silteme jasap.
Qarsy alý rásiminen soń Nursultan Nazarbaev Abý-Dabidiń taq murageri, Birikken Arab Ámirlikteri Qarýly kúshteriniń Joǵarǵy Bas qolbasshysynyń orynbasary, sheih Muhammed ben Zaid Ál Nahaianmen keńeitilgen quramda kelissóz júrgizdi.
Qazaqstan Prezidenti qonaqjailyq kórsetkeni úshin Muhammed ben Zaid Ál Nahaianǵa rizashylyq bildirdi.
– Meniń resmi saparymnyń Birikken Arab Ámirlikteriniń negizin qalaǵan sheih Zaid ben Sultan Ál Nahaiannyń 100 jyldyǵymen tuspa-tus kelýiniń simvoldyq máni bar. Men úshin Sizdiń ákeńizben tanys bolǵanym – zor mártebe, – dedi Memleket basshysy.
Nursultan Nazarbaev baýyrlas qarym-qatynastar men tabysty kezdesýler eki el arasyndaǵy bailanystardyń damýyna tyń serpin beretinin atap ótti.
– Ózara ýaǵdalastyqtardy iske asyrýdyń arqasynda tek 2017 jyly saýda-sattyq kólemi 2 ese ósip, 374 million dollardan 643 million dollarǵa deiin jetti. Al 2015 jyldan bastap bul kórsetkish 6 ese artty, – dedi Qazaqstan Prezidenti.
Nursultan Nazarbaev vizasyz rejim engizý eki el arasyndaǵy qarym-qatynastarǵa oń áser etetinine nazar aýdaryp, taraptar investitsiialardy qorǵaý, ǵarysh tehnologiialary, sý energetikasy, munai himiiasy, aýyl sharýashylyǵy jáne tsifrlandyrý salalaryndaǵy yntymaqtastyqty ári qarai ilgeriletýge múddeli ekenin atap ótti.
Sońynda Qazaqstan Prezidenti Birikken Arab Ámirlikteriniń Prezidenti sheih Halif ben Zaid Ál Nahaianǵa degen niettestigin bildirip, taq murageri Muhammed ben Zaid Ál Nahaiandy Qazaqstanǵa resmi saparmen kelýge shaqyrdy.
Muhammed ben Zaid Ál Nahaian resmi saparmen kelgeni úshin Nursultan Nazarbaevqa alǵys aitty.
– Halqymnyń jáne jeke ózimniń atynan Sizge Birikken Arab Ámirlikteri jerine kelgenińiz úshin rizashylyq bildiremin. Saparyńyz sátti bolady dep senemin. Biz búgin birqatar mańyzdy ekijaqty qujattarǵa qol qoiamyz. Jan-jaqty yntymaqtastyqqa daiyn ekenimizdi aitqym keledi, – dedi Muhammed ben Zaid Ál Nahaian.
***
Resmi sapar barysynda taraptar arasynda mynadai qujattarǵa qol qoiyldy:
– Qazaqstan Respýblikasynyń Úkimeti men Birikken Arab Ámirlikteriniń Úkimeti arasyndaǵy Investitsiialardy kótermeleý jáne ózara qorǵaý týraly kelisim;
– Atyraý oblysynda integratsiialanǵan gaz-himiia keshenin (polietilen óndirisi) salýǵa qatysty yntymaqtastyqtyń negizgi sharttary týraly memorandým;
– Atyraý oblysyndaǵy polipropilen óndiretin zaýyt jumysyna qatysý úlesin satyp alýǵa bailanysty ózara túsinistik týraly memorandým;
– «Aqtaý teńiz porty» arnaiy ekonomikalyq aimaǵy aktsionerlik qoǵamynyń 49% aktsiiasyn satyp alýdyń negizgi qaǵidattary týraly negizdemelik kelisim;
– «DP World» kompaniiasynyń «Qorǵas – Shyǵys qaqpasy» arnaiy ekonomikalyq aimaǵynyń basqarýshy kompaniiasy» aktsionerlik qoǵamynyń kapitalyna qatysýynyń negizgi qaǵidattary týraly negizdemelik kelisim;
– Dýbaidaǵy «EKSPO-2020» dúniejúzilik kórmesine qatysý týraly shart.
