Elbasy Ulttyq qaýipsizdik komitetiniń tóraǵasy Kárim Másimov pen Ishki ister ministri Qalmuhanbet Qasymovty qabyldady, - dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna 2017 jylǵy bes aidyń qorytyndysy boiynsha eldegi qylmystyq ahýaldyń jaǵdaiy týraly esep berildi.
Nursultan Nazarbaev quqyq qorǵaý organdary júrgizip otyrǵan sharalardyń nátijelerine toqtalyp, azamattardyń qaýipsizdigin qamtamasyz etý jónindegi jumystyń sapasyn jaqsarta berý qajettiligin atap ótti.
– Jalpy, jaǵdai jaqsaryp keledi. Qylmys jasaý 16 paiyzǵa azaidy. Olardy ashý kórsetkishi 60-tan 70,2 paiyzǵa kóterildi. 26 myń adamǵa raqymshylyq jasalyp, 1200 adam bas bostandyǵynan aiyrý oryndarynan bosatyldy, – dedi Qazaqstan Prezidenti.
Ishki ister ministri Halyqaralyq «EKSPO-2017» mamandandyrylǵan kórmesin ótkizý kezinde Astanadaǵy quqyqtyq tártipti qamtamasyz etý barysynda qabyldanyp jatqan sharalar týraly baiandap, ishki ister organdaryndaǵy reformalardyń nátijeleri jóninde aitty.
Elbasy Halyqaralyq «EKSPO-2017» mamandandyrylǵan kórmesiniń ashylýynda tiisti qaýipsizdikti qamtamasyz etkeni úshin quqyq qorǵaý organdarynyń barlyq qyzmetkerlerine rizashylyq bildirdi.
– Kóptegen memleketter basshylary men qonaqtar qatysqan «EKSPO-2017» kórmesiniń ashylýynda qaýipsizdikti qamtamasyz etken elimizdiń búkil politsiia qyzmetine, Ulttyq qaýipsizdik komitetine, «Syrbar» syrtqy barlaý qyzmetine jáne basqa da organdarǵa alǵys aitamyn. Biz kórmeniń ashylýyn uiymshyldyqpen ótkizdik, – dedi Memleket basshysy.
Nursultan Nazarbaev mundai is-sharalardy ótkizý kezinde qaýipsizdikti qamtamasyz etýdiń airyqsha kúrdeli másele ekenine toqtalyp, barlyq quqyq qorǵaý organdarynyń jumysyn joǵary baǵalady.
– Astanaǵa oblystardan adamdar jiberildi. Ofitserlerdiń barlyǵy belgilengen oryndarynan tabyla bildi. Árqaisysy ózine tapsyrylǵan ispen ainalysty. Barlyq salada da kásibiliktiń joǵary deńgeii qamtamasyz etildi, – dedi Qazaqstan Prezidenti.
Kezdesý sońynda Elbasy birqatar naqty tapsyrma berdi.
.jpeg)