XII Astana ekonomikalyq forýmynda álemdik ekonomikanyń problemalary talqyǵa salynbaq. Osy oraida Qazaqstannyń Tuńǵysh Prezidenti Nursultan Nazarbaev óz kózqarasyn bildirdi, dep habarlaidy Sputnik Qazaqstan tilshisi.
"Mine, 30 jyldan beri, sonaý keńestik kezeńnen bastap men Qazaqstandy basqardym. Osy ýaqyttyń ishinde kóptegen memleket basshysymen kezdestim. Árine, biraz tájiribe jinaqtaldy. Osyǵan bailanysty óz kózarasymdy jetkizgim kelip otyr", - dedi Nazarbaev XII Astana ekonomikalyq forýmynyń plenarlyq otyrysynda.
Onyń aitýynsha, búginde halyq sanynyń ósýi ekonomikanyń damýyna aitarlyqtai áser etpeidi. Atalǵan faktor báseńdep keledi. Birinshi orynǵa eńbek ónimdiligi shyǵyp otyr. Máselen, sońǵy 50 jyldyń ishinde damyǵan memleketterde ishki jalpy ónimniń úshten biri ǵana halyq sanynyń ósýi arqasynda kóterildi. Qalǵany eńbek ónimdiliginiń úlesinde. Sarapshylardyń aitýynsha, dál osy kórsetkishti jaqsarta alatyn memleketter básekege qabiletti bola alady.
"Ekinshiden, tsifrlyq tehnologiialar ekonomikaǵa qatysty bizdiń búgingi kózqarasymyzdy túbegeili ózgertip otyr. Máselen, Apple, Google, Microsoft Amazon siiaqty kompaniialar dástúrli jáne investitsiialyq kompaniialardy yǵystyryp otyr. Olardyń jalpy quny 3,5 trillion dollardy qurap otyr. Atalǵan kórsetkish keibir damyǵan elderdiń ishki jalpy ónimimen birdei bolyp tur. Máselen, Germaniianyń ishki jalpy ónimi 3,6 trilliondy quraidy", - dep atap kórsetti Tuńǵysh Prezident.
Úshinshi basymdyq – ol adam kapitaly. Búginde mobildi jáne kreativti adam kapitaly ǵana kez kelgen ekonomikany tabysqa jetkize alady. Al qalypty fýnktsiialardy avtomanttandyrýǵa bolady. Qazirdiń ózinde álemdik ekonomikadaǵy jumys ýaqytynyń jartysyn avtomatty rejimge aýystyrýǵa múmkindik bar.
"Osy oraida bir mańyzdy máseleni atap ótken jón. 2030 jylǵa qarai álem boiynsha, shamamen, 375 million adamǵa, iaǵni barlyq jumys kúshiniń 14 protsentine qaita daiarlaýdan ótip, óz kásibin aýystyrýǵa týra keledi. Al jańa tehnologiialar keibir mamandyqtardy ysyryp tastaidy", - dedi Nazarbaev.
Tórtinshiden, iri qalalardyń ekonomikalyq áseri arta túsedi. Búginde álem boiynsha 4 milliardtan astam adam qalalyq jerde turady. Boljamǵa sáikes, 2050 jylǵa qarai qala halqy eki esege ósedi. Al investitsiialar memleketke emes, qalaǵa quiylady.
"Qazaqstan da álemdik ýrbanizatsiia úderisinen tys qalyp otyrǵan joq. Bizde halyqtyń 40 protsenti aýylda tursa da, jartysy qalada jumys isteidi. Búginde úsh iri qalamyz bar. Elordamyz 20 jyldyń ishinde 1,2 million halqy bar qalaǵa ainaldy. Almatynyń halqy 2 millionnan asty. Byltyr olarǵa Shymkent qosyldy. Endi, taǵy eki qalany osy deńgeige kóterip jatyrmyz. Atalǵan qalalar magnit siiaqty halyqty tartyp, bilim men tehnologiialardyń oshaǵyna ainalady. Qazaqstandaǵy qalalardyń tabysy elimizdiń álemdik naryqtaǵy básekelestigin kúsheitedi", - dep túiindedi Qazaqstannyń Tuńǵysh Prezidenti Nursultan Nazarbaev.
